Super Girls誘人趷籮 怕望譚校長
以集體回憶為主題的《YES!25週年演唱會》前晚在會展舉行，眾藝人輪流表演，包括譚詠麟（校長）、Super Girls、劉錫明、草蜢、孫耀威、葉佩雯等。草蜢打頭陣載歌載舞，成員蘇志威在台上被踢爆儲了很多太太劉小慧的閃卡，後來更儲埋個老婆回家。
到Super Girls表演時，五女又唱又跳，不時做出蹲低、趷籮等誘人動作。受訪時，Super Girls坦言雖然曾跟校長同台，但今次合唱心情仍緊張，特別是跟對方對望。成員Aka表示兒時試過寫信給偶像容祖兒問問題，Heidi則謂曾寫信申請要偶像Twins的禮物。講到該雜誌當年有個環節是介紹靚女，Jessica自爆曾擔任模特兒，但大呻當時很肥：「好後悔影咗嗰輯相，依家唔敢攞番出嚟睇！」
劉錫明「是緣是債是場夢」
而久未露面的劉錫明一出場即獲觀眾歡呼，他在台上說：「呢廿幾年裏面，好多朋友都擔心我有惡性（腫瘤）…托賴，我一向以來身體好好。好多人諗起我個花名（毒瘤明），其實我好感恩，因為呢個名令好多人仲記得我，畀咗好多歡樂大家。」最後校長壓軸出場，氣氛最熱烈，唱到快歌medley時，眾歌手上台大合唱，全場high爆！
騷後劉錫明表示今次回流是為了見朋友，問可會找當年傳暗戀的周慧敏？他謂已20多年沒有聯絡。問何時走出了花名的陰霾？他表示是結婚生女，為人開始成熟後。之後可有意返港發展？他說：「當然有，香港是我家，但都要睇機會，你哋願意聽我就願意唱。（人工少過你喺內地賺錢？）唔可以樣樣嘢講錢。（依家有人搵你未？）做完呢個騷再睇往後點。」
文：音樂組
攝：劉智源