胡杏兒嘆愛得太遲挑戰做媽咪
胡杏兒去年底與圈外男友李乘德拉埋天窗，並展開馬拉松式漫長蜜月之旅，杏兒間中更在微博放相分享喜悅。提到蜜月路線，杏兒日前受訪只肯簡略說：「我放咗兩個幾月假，去咗12個城市，每個地方都有令人懷念嘅片段，最鍾意嘅可能係馬爾代夫，因為好Relax，只係浮潛同食嘢，我哋揀呢度做最後一站，都係為返港工作鋪路，等自己可以沉澱心情。（旅途中可有奇遇？）我諗係愛琴海！我哋去到嘅時候係Off Season，只有十分一舖頭開，好似去咗個無人城市咁，不過又覺得另有風味，因為冇咁多人。」
主攻大銀幕
杏兒坦言跟老公都覺得認識得好遲，所以希望爭取多些時間相處，之前放兩個幾月假，都盡量不看電話、不處理公事，珍惜大家一齊生活的時間。談到何時做媽媽？她說：「呢個都會係個好大嘅挑戰，我都希望做到。（同老公已經不設防？）總之順其自然，有嘅你哋一定會知！」
談及工作方針，杏兒表示會有新嘗試：「嚟緊工作目標會放喺電影，想做啲未做過嘅角色。（再踏樂壇？）唱歌可以業餘性質，登台唱吓，做歌手就未必，因為要好多時間宣傳。」
文：影視組
攝：黎志輝
化妝：Miko Wong（Cyrus Lee Team）
髮型：Lorraine Lam@Hair Culture
場地：如心艾朗酒店