大仔美國炒車秋生攬住阿媽喊

影帝兼視帝黃秋生前晚在微博貼出一張車輛被撞至扭曲變形的照片，車身損壞得非常嚴重，他寫道：「撞到這樣都生還，我很感恩，感謝主。」令人擔心是他還是身邊人發生交通意外，秋生接受《東網》電話訪問時，透露是身在美國讀書的大仔黃一一撞車，他說：「我個仔坐佢朋友開嘅車，撞樹反車，我唔係好記得係邊日，我諗大約係13日，但我過唔到去！一來要做舞台劇，二來冇美國簽證，我老婆就過去嗰邊了解情況。」

戴頸箍無礙彈琴

起初收到消息指兒子傷勢嚴重，一度停止呼吸，令秋生心急如焚，平日Man爆的秋生更不禁傷心流下男兒淚：「收到消息嗰刻，啲人仲話佢入院已經冇呼吸，我梗係擔心，我喺香港等老婆消息期間，有日我攬住阿媽喊，佢掃吓我隻手話：『唔使驚，上天將所有好嘅嘢都畀晒我。』聽完呢句，我更加忍唔住！」

其後黃一一的傷勢好轉，更極速能自己落床走路，令秋生放下心頭大石：「我老婆去到當地，見個仔已經醒番喺度換衫，我喺電話聽佢把聲有神有氣，咁我都放心晒！後尾知道佢仲行得走得，只係要戴頸箍，同埋做物理治療，我個仔平時有彈琴，啲護士都話佢可以照彈，冇問題！」

執番條命唔追究

現時秋生堅持跟兒子每日以電話聯絡，了解對方情況，問到會否提醒兒子以後要帶眼識人，不要胡亂坐別人車？秋生表示不打算再追究：「執番條命乜都唔好計啦！我個仔幾靚仔o架！冇割爛塊面都執到，要我使幾多錢醫療費都唔諗囉！（完成舞台劇後過去探仔？）未得住呀！仲要接拍導演邱禮濤新戲，我寫呢段微博係想畀大家知道，遭遇乜嘢困難都唔緊要，擘大眼仍然行得走得，都應該感謝主！」

文：影視組