吳千語被舊愛摸手掃背
元旦凌晨時分，吳千語撇下男友林峯夜蒲蘭桂坊，同場還有「舊愛」林建龍（Derek）！關係友好的二人在場內頻頻咬耳仔，更暗黑攬腰搭膊摸面摸手仔，千語入場45分鐘後速離。她回應指與Derek在場內巧遇，與他只是朋友間閒聊，向男友大派定心丸，林峯亦直言百分百信任女友！
除夕夜，藝人紛紛深夜出動，林峯女友吳千語都撇仔夜蒲中環Dragon-i！凌晨一時，曾與千語傳拍拖的王愛倫細仔林建龍（前名：林建隆）於場內與一班男友人一起，至凌晨三時，輕便打扮上陣的千語現身老蘭，正與友人通電的她向站在對面馬路的朋友揮手。發現記者後，她面露尷尬並以手掩面，但當記者向她說新年快樂時她亦禮貌點頭。之後她會合兩名女友人及一名男友人，即熱情向女友人擁抱打招呼。
面貼面嚇一嚇
千語入場後與Derek親密咬耳仔，傾到興起更不避嫌攬腰搭膊頭，男方更親暱掃千語背脊，可見二人關係友好！當千語舉杯自隊時，同時伸手遞另一杯酒給Derek，他乘機摸一摸千語手仔，然後受落地乾杯！未幾一名女友人帶醉到場，Derek、千語一同扶她入座後，Derek突然湊近與千語面貼面，嚇得千語即刻退後一步並摸自己面珠，在夜店逗留約45分鐘後千語速速與女友人離開，而千語更玩到盡興除辮，離場前Derek還出手摸摸千語秀髮！
林峯：早「備案」
千語與「舊愛」短敍不怕男友林峯呷醋？她透過經理人表示：「大家喺店內撞到，朋友式打招呼傾偈好正常，大家唔使諗多咗。對方已經有個穩定女友，我同林峯都識，大家都係朋友，所以係一件好普通嘅事，唔使過分敏感，祝大家新年快樂！」原本身在廣州工作的林峯昨晚已回港，他透過經理人回應時指女友早已向他備案：「BB有通知我，仲叫埋我去，不過我約咗人開會去唔到。Derek我都識，佢哋成大班人一齊，人多之下佢扶吓千語只係gentleman表現啫！」可謂百分百信任女友。
文：專案組
攝：追蹤組