崔碧珈陳婉衡鬥Chok唧出香艷
藝人崔碧珈、陳婉衡、莊思敏和岑日珈昨日為新片拍宣傳海報，個個以「胸」湧火辣造型的聖誕女郎上陣，事業線鬥深鬥長，其中谷得最勁胸的崔碧珈和陳婉衡猛力上下chok唧cream整餅時，胸前跌宕，相當吸睛。
昨日以一身紅白兩色聖誕氣氛Look的藝人崔碧珈、陳婉衡、莊思敏（Jacquelin）、岑日珈（Angie）等到柴灣為電影《PG戀愛指引》拍攝海報，除女主角Angie外，眾女大晒心口事業線，性感唧cream整餅，滿場歡樂氣氛。由於要大力按壓噴嘴才能唧出忌廉，崔碧珈、陳婉衡等有料之人，心急得起勢猛Chok，胸前上下跌宕，才能成功唧出Cream，場面搞笑。
否認鑽戒晒命
Angie否認身為女主角可以守身如玉，更試圖為《東網》踢爆她在私人Facebook內貼鑽戒「晒命放閃」一事解畫，她說：「我依家係單身嘅，我唔係放閃，啲相係上年，戒指係晚宴上問人借，唔係我嘅。紮花係因為我鍾意花，其實上年我同個男仔了解中，後來發現個男仔唔係想像中咁好，剪髮期望有新開始，我哋冇開始過，只係曖昧了解嘅關係。」
崔碧珈則謂新片中有大尺度演出，她說：「係拍戲以來最大尺度，有做打底。（望落似冇着衫？）咁就要入戲院睇！」Jacquelin回應王宗堯前日不點名以「麻煩對手」形容她：「唔回應，但做人唔好欺人太甚。（你覺得王宗堯係麻煩對手？）不予置評，戲會照做，私下唔會接觸。（有冇Friend做？）冇！」
文：影視組