羅霖被屈冇送花圈:寫到我千古罪人

劉坤銘父劉思仁早前逝世,曾經是新抱的羅霖被指未有出席其喪禮,人不到連花圈也欠奉,羅霖昨不禁呼冤,認為是一件難過的事,外界不應再大做文章。

羅霖前夫劉坤銘的父親劉思仁上月二十五日逝世,前日出殯。羅霖曾指劉思仁生前很疼錫她三個兒子,故很想出席喪禮,故曾透過兒子向前夫詢問能否出席,但遭拒絕。未能出席送前老爺最後一程已令羅霖難過,但昨日再有指她連花圈也欠奉,令她背上不孝之名。

羅霖昨日接受電話訪問強調有送花圈:「我有送到,影唔到就話我冇送,覺得主要等老人家安息,唔好再講呢件事,始終係一件難過唔開心事,唔知點解報道完又報,好希望周刊可以放過我囉!一件好難過嘅事,點解要寫咁多,寫到我千古罪人咁!」

想退出娛圈

羅霖明白喪禮有心便可以出席,但問題是對方家人根本不欲她出席:「問題係人哋唔歡迎我,去到可能被趕走,問過佢哋都係唔想我出席,驚記者追住我,覺得我好似做新聞。我係好想出席,無奈地唔可以出席,講到連花圈都無,好無奈囉!」喪禮現場其實有羅霖致送的花圈,證明她所言非虛。她又謂:「唔知點解最近有咁多負面新聞,我只係為咗三個仔而努力工作,真係有退出娛樂圈念頭。」