Bob棟篤笑 擺小春上枱

林盛斌昨於旺角以「肥拳王」造型，為即將舉行的《瑞士寶光學眼鏡片呈獻：Bob's Up伊館2015》宣傳，司儀問他會否為表演操出爆肌身形？他笑指司儀「諗多咗」：「會減一至兩磅！」

太太未有投訴

Bob表示開騷時會分享入行前後所遇的怪事，問若爆秘聞會否怕得罪人？他說：「會講受過咩不合理對待，引人共鳴。（唔驚得罪人？）唔會，我又唔會周圍攻擊人。」

再問會否於表演中提及日前醉酒大鬧錢國偉婚宴一事？Bob表示：「會將件事擺埋落去，我冇真正盡力控制自己。（咀梁烈唯咀到想嘔？）我冇意識。我之前出席演藝人協會活動都醉，事後同曾志偉道歉，佢話『冇咩所謂，我以前都係咁』。（唯唯有咩感受？）佢應該enjoy。（太太投訴？）佢冇咩反應。」

Bob邀得拳擊教練一起出席宣傳。

Bob希望當面向小春（右）道歉。

飲酒適可而止

找來梁烈唯當和事老的Bob又直言想當面向小春道歉：「搵咗唯唯打畀佢，唯唯話我知佢冇嘢。我諗過使唔使自己再打去，但佢唔係斤斤計較嘅人。如果我令佢唔開心同覺得唔尊重，我下次想認真道歉，佢大人有大量，我會加油！」問會否戒酒？Bob直言會適可而止：「有諗過，但做嘢應酬好難免，會一杯起、兩杯止。」

文：影視組