姚子羚high爆摸仔 洪永城體能弱雞

陳凱琳（Grace）、洪永城、姚子羚及黃智雯等昨日為台慶劇《張保仔》做宣傳，一眾演員又即場打拳、做掌上壓測試體能，平日做開運動的陳山聰和陳志健（Otto）輕易完成任務，相反，洪永城則做到面紅變「關公」，狀甚辛苦！

自言想變強　保護身邊人

之後，他們又玩「掂膊遊戲」，Grace不慎遭洪永城輕拍纖腰；而向來形象斯文的子羚，看到外籍大隻紋身男示範時，即刻high爆尖叫兼面紅，跟對方互鬥「掂膊」時，她更失控周圍摸，連在旁的山聰也不禁笑謂：「睇佢個樣幾鹹濕，平時跑步都冇笑得咁甜！」確實有「揩油」之嫌！

洪永城測體能，被嘲「弱雞」。	平時斯文的姚子羚狂摸外籍大隻男。	陳凱琳與洪永城扮打拳，看似有板有眼。

事後，被記者嘲笑「弱雞」的洪永城反駁：「面紅唔代表弱，係血氣暢順、毛孔發達，平時都有做開運動，所有球類運動我都非常叻，嚟緊都想keep住學功夫，之前有學大聖劈掛。我比較單薄，想變得剛強啲。（女友唐詩詠嫌太奀？）唔係，每個男士都想強壯啲、實淨啲，可以保護到身邊嘅人。」並謂拍畢《張》劇後，自覺有潛質拍動作戲，希望繼續鍛煉做「打仔」。

陳凱琳感激鄭嘉穎鼓勵

提到男友鄭嘉穎拍過《拳王》，Grace稱不知道對方打拳是否耍家，但謂：「啱啱見到黃智雯打得好有型，我唔排除將來想試吓。嘉穎都話拍劇打上癮，都想繼續鍛煉。」對於遭黃秋生批評演技，後獲嘉穎力撐「有Character」兼能迅速躍進，Grace說：「佢不嬲都好鼓勵我、個人好中肯，佢睇過一集都話我啲戲有時太用力，呢啲係善意嘅。」談到主角之一的陳展鵬因病缺席，洪永城指對方正趕拍《城寨英雄》，可能太多動作場面打到攰而「冧廠」。

文：影視組