譜久村聖刻毒美少女

渾然天成

早安少女組呢隊超過10年嘅日本美少女組合，相信大家就算未睇過佢哋嘅演出，亦聽過佢哋個名，唔少前成員好似後藤真希、松浦亞彌嘅寫真大家亦肯定睇過。雖然早安嘅人氣一度下滑，被後來嘅AKB48、乃木坂46等趕上，但係近年相繼招攬到唔少優秀成員，令組合大有中興之勢，除咗前領導人道重沙由美之外，新一代嘅領導人譜久村聖亦係一等一嘅美人兒。譜久村聖現時認真係十八歲卜卜脆，充滿青春氣息，五官標致配上圓圓哋嘅面形，感覺甜美而親切。阿妹雖然青春可愛，面上卻帶有一種楚楚可憐之感，早安嘅製作人淳君都話阿妹容易流露出多愁善感一面，比起好多只顧賣萌嘅美少女更加嗒落有味道。聖妹身材亦係值得細味，凹凸有致且肌膚雪白粉嫩，認真係渾然天成，無可挑剔。

全力接棒

至於點解譜久村聖咁多愁善感呢？可能同佢好細個就拋頭露面有關。10歲嘅時候，聖妹參加「可愛Ring Girl比賽2006」獲得第二名，之後成為美少女組合「Hello! Project Egg」成員。聖妹為咗令自己有更多演出機會，於是又去面試加入早安少女組，諗住成為第9代成員，之不過經過三次面試都落選。幸好，皇天不負有心人，一年之後終於畀聖妹投考成功，上年第8代早安領導人道重沙由美宣告退出組合以獨立身份發展之後，聖妹就獲推介成為第9代領導人。沙由美對聖妹一向都相當痛錫，而聖妹亦視師姐為學習對象，亦果然係學到足。聖妹同沙由美一樣不時拍攝水着寫真大騷火辣身材之餘，亦係一樣說話寸嘴又刻毒。一次沙由美同聖妹去剪頭髮，髮型師問聖妹想點剪，聖妹用手摷亂晒把頭髮，搞到成個癲婆咁，跟住寸寸貢話要剪得同沙由美一樣咁「可愛」喎！事後沙由美大讚聖妹嘅毒舌能力同自己有得揮，放心交棒畀聖妹。不過，聖妹唔係話有心寸人，平時待人接物都相當親切，深受朋友信賴。

組合博客

由於現時譜久村聖同生田衣梨奈、鞘師里保以及鈴木香音結成組合活動，博客亦以組合形式運作，但係博客上發布嘅消息則會作個人分類，想知道譜久村聖嘅最新動態可以Click上去睇。

網址：http://ameblo.jp/morningmusume-9ki/theme-10059757620.html

譜久村聖Profile

年齡：18歲

身高：5呎4吋

三圍：34-23-34

撰文：賢