苟芸慧童心蛋起

虜盡人心

「我最鍾意係整嘢食，今次開點心餐廳，喺緣分情況下而做，可以整畀朋友食，佢哋食得開心，自己就開心，好似今次我哋以七位數字金額版權費，向日本購得Hit爆嘅卡通人物『蛋黃哥』作招徠，將造型融入點心內，試業發售第一天就逼爆餐廳，朝早十點半就排隊，我真係好驚訝，冇諗過有咁多人鍾意，其中一款蛋黃哥梳乎蛋流沙包一早售罄，有一家人嚟幫襯，但冇得食呢款流沙包好失望，我惟有不停氹個小朋友，應付呢種工作都係技巧，我學到好嘢！

其實今次做餐廳，我主要做幕後部分，設計食物，保持質素咁啦……都係我負責，而傾卡通版權就交由另一個部門嘅人負責，不過據我所知，蛋黃哥會keep三個月，除非好受歡迎先會傾續期，否則下個卡通人物將在三個月後更新，呢個卡通人物Crossover點心嘅意念得到空前成功，係我意料之外！嚟緊餐廳會開多兩間，新投資者係莊思敏，而我就主要主理喺尖沙咀呢間餐廳，不過，我嘅股東朋友都好想我兼顧餐廳宣傳工作，所以我除咗設計嘢食外，都會幫手做宣傳，但下個月我會返加拿大陪爸爸過生日，兼接受甲狀腺手術，十月底返香港，到時會再睇自己狀態如何，再決定繼續幕前演出，抑或全情投入做點心妹！」

苟芸慧仍未決定做點心妹還是再拍劇。	梳乎蛋震騰騰奶凍	梳乎蛋雜菜沙拉

用情專一

「今次返加拿大做手術，除咗向公司報備之外，當然父母都有問過意見，其他人我就冇多講，有人問我如果拍拖，有個男友支持對個病有幫助，但我呢一刻都未識得愛自己，又點去愛其他人呢？我係一個一拍拖就全情投入瞓身去愛嗰種人，要知道談戀愛嘅過程係甜酸苦辣，當中遇到挫折會令病情更壞呢！我寧願專心整嘢食，專心醫病，再專心談戀愛，一步一步，一定能達到人生目標。」

樂易玲讚賞苟芸慧推介的美食。

苟芸慧認真炮製蛋黃哥美食。

去向未明

「幕前演出開心定係做點心妹開心？其實我到依家都未捉摸到，不過，只要我有一份童真，去到邊都開心，如今呢個階段，我呢份童真放喺餐廳上，喺舖面好多得意卡通造型，又見到食客食到我設計嘅食物，佢哋開心，已經好滿足，呢一刻我好享受呢個Job，但無綫都有同我傾，想我好番後再出番嚟。其實我好明白佢哋喺我身上放咗好多心機，都要報恩，呢四個月假期，我都要問清楚自己想點行。因為生意發展都有另一種辛苦，同幕前工作係唔同種類嘅壓力，要睇自己身體點樣調整，其實呢兩年自己都成長咗，明白任何範疇都會遇到問題，只係未深入去做，就唔知要面對咩問題，等如我入行乜都唔識都覺得好好玩但有壓力！」

樂易玲撐場試食讚好

苟芸慧開餐廳自喻為人生轉捩點，雖然目前正在放假中，但無綫高層樂易玲相當關心旗下藝人的動向，在「蛋黃哥」點心推出當日，樂易玲特別前往「撐場」，並試食點心給予意見，樂易玲「留肚」品嘗了「梳乎蛋雜菜沙拉」、「真真假假流心布丁」和「梳乎蛋震騰騰奶凍」等，對苟姑娘的精心炮製感不錯，即場了解餐廳跟這類卡通人物的合作細節。樂易玲近年染指邵氏電影工作，要是遇到一些電影內的動畫人物，都想諗計去宣傳一下，故特別關心苟姑娘這次以點心和卡通人物Crossover的商機，希望假以時日，公司和苟姑娘的餐廳都會有合作機會。

口述：苟芸慧

影：司徒國榮