囝囝恨要妹千嬅預告再造人
藝人楊千嬅昨日現身中環出席宣揚母乳餵哺活動，以過來人身份分享心得：「試過喺公司開會中途要餵奶，走入會議室又驚有閉路電視，結果去咗廁所，無得坐之餘仲要凌空咁餵，好唔方便。」雖然如此，但千嬅直言餵母乳令她與囝囝Torres感覺更親近：「佢成日都好黐我。我有問佢要多個BB Boy好唔好，佢話No，但問佢要Sister佢就話OK，都唔想同Torres年紀差太遠，最好唔好大過五年。不過之前入過醫院身體仲好虛弱，等我養好身體先。」
千嬅稱對再添仔或女都無所謂，笑言天生奶奶相，反而老公較像外父：「同老公拍緊《極速前進》時，佢成日當我好似七歲咁，行兩步就叫我睇路。」又指全靠老公玩得投入帶她過關。