Annie G.生完嫁鑽石男
下嫁黃曉明的Angelababy未宣布懷孕，卻被有「翻版Angelababy」之稱的Annie G.捷足先登！約滿nowTV後一直「潛水」的Annie G.，被發現佗住六個多月巨肚，在尖沙咀狂掃女裝BB衫及用品，其後又翹實有米男友Henry現身養和醫院，據知，兩人打算於產後補辦婚禮。
5月嫁給黃曉明的Angelababy（楊穎）屢傳懷孕，可惜一直只聞樓梯響，反而有「翻版Angelababy」之稱的中西混血模Annie G.（吳燕安）卻驚爆有喜！曾為麥浚龍歌曲《弱水三千》擔任MV女主角的Annie，自約滿nowTV後甚少現身公開活動，據知，打算轉戰大銀幕的她已接下兩部電影、多個打碟工作及海外商演，惟最近她接連無故推job，朋友聚會也未有蒲頭，連月來大玩人間蒸發，得罪晒一班好友及客戶！
做闊太唔怕得罪人
原來Annie有口難言，知情人士透露：「Annie不嬲都係個工作狂，即使大肚都唔肯話畀人聽，因為佢驚啲人唔搵佢做嘢，所以身邊好多人都唔知呢件事，不過個肚愈嚟愈大，冇辦法再隱瞞，惟有推晒啲job，都冇咗成六位數！」雖然今次損失慘重，Annie也不愁「奶粉錢」，因懷孕六個多月的她已泊得好碼頭，據知，其另一半Henry乃經營鑽石生意的老闆，兩人打算BB出世後在外地補辦婚禮；為了年尾迎接BB的來臨，他們更計劃細屋搬大屋，27歲的Annie更「升呢」變闊太。
騷巨肚行街買BB嘢
大肚後深居簡出的Annie終於靜極思動，日前在胞姊陪同下現身尖沙咀某商場，身穿紅tee波鞋、戴cap帽的她，一身潮look挺住巨肚行街街，主攻BB衫、玩具及生活用品。兩人先在家品店內左睇右睇，研究完各款地氈、毛巾後，行到攰乘機試坐梳化抖抖，Annie更不時用手摸巨肚。之後，她倆轉到嬰兒用品店揀BB衫，腹大便便的Annie身手非常靈活、健步如飛，甫進店內已睇中一輛過萬元的富貴BB車，加上她一直拎女裝細看，估計今胎是B女。至晚上七時許，Annie約同男友前往養和醫院聽產前講座，男方對她照顧有加，沿途翹實女友上樓，十分細心。
Annie G. Profile
原名：Annie Gesela，吳燕安
出生日期：1988年6月26日
身高/體重：1米65/98磅
三圍：32B、24、35
入行經過：2009年簽約周秀娜模特兒公司Jamcast，與盧頌之（DaDa Lo）、A.Lin（裴殷）等組成「八模軍團」出寫真，其後跟Hailey C.組成DJ組合Monster Beez，至2011年參加now觀星台節目《我是CEO》成為娛樂新聞主播。
文：影視組