傷膝周秀娜死撐着高踭鞋
周秀娜（Chrissie）日前拍戲時仆倒傷膝的片段昨日終於曝光，落力奔跑至跌倒的她引來七男「護花」相扶。腳傷未愈的Chrissie前晚與任賢齊及狄龍錄影無綫節目時，更包實紗布堅持負傷上陣，還說：「應該唔怕有事嘅！」
藝人周秀娜日前拍攝電影時不慎傷膝及觸及韌帶舊患，而她當日仆倒的片段更於昨日曝光。只見她於追逐戲份中落力奔跑，但途中卻不慎跌倒。此舉即引來身旁的七位男演員一擁而上「護花」，又爭相扶起她往清潔傷口。
無礙新片進度
腳傷未愈的Chrissie前晚與任賢齊及狄龍於電視城錄影節目《今晚睇李》，包實紗布任嘉賓的她以平底鞋現身，更敬業地堅持要以高踭鞋拍攝。她說：「我都有問醫生着唔着得高踭鞋，佢話都得嘅。我見李思捷次次都西裝骨骨咁靚，我都要襯番佢，入到廠先換鞋都係坐低先着，應該唔怕有事嘅！」談到傷勢，Chrissie直言要覆診及戒口：「要keep住覆診，戒口唔好食辣同蘿蔔，好在我嘅動作戲都拍晒，之後都係文戲。我傷咗嗰刻好擔心會影響拍攝進度，仲問導演使唔使嚟多次？」
狄龍與櫈練舞
同場任賢齊就透露日前找來狄龍演出他首執導演筒的電影，更笑指戲中要跳舞的狄龍以只會牽太太的手為由，拒絕舞蹈老師的邀舞要求。而狄龍聞言就笑斥小齊踢爆自己的醜事：「仲好講，因為咁我要同張櫈練舞呀！當日佢叫我演戲，佢話錢又唔多，戲又唔多，不過角色好重要，係做佢老竇，冇老竇就冇佢啦，咁我就被佢誠意說服咗。之前喺澎湖海邊拍外景，大風仲捲走咗啲布景！」
文：影視組