蔣怡學成開私房菜

已婚兼有一女的名模蔣怡（CoCo）去年底毅然放下一切，遠赴英國倫敦攻讀為期九個月的「巴黎藍帶廚藝學院課程」，她不諱言赴英首個月非常難捱，更自爆日日以淚洗面：「第一個星期好似一年咁長，每晚返到屋企都覺得點解會咁難同咁辛苦？基本上每次同囡囡傾視像電話，都係一路喊住一路講。」在CoCo離家兩個月後，囡囡已記不起她：「可能我忙，一星期先傾得一次，佢唔記得我，對住鏡頭都唔係好知我係邊個，嗰時我就心情好差。」

發誓不再出走

「學生」身份為CoCo帶來沉重壓力，慶幸得到家人鼓勵，令她支撐下去。距離達成夢想尚餘一個月，惟CoCo表明不會再追夢，因為付出的代價太大：「當我一個人獨處，我會掛住屋企、小朋友同香港嘅生活，好似喺兩個世界之間掙扎咁，以後好難再有咁嘅經歷，因為當小朋友慢慢長大，我唔會再捨得離開佢，我仲同佢發誓：『畢業返嚟我唔會再離開你』。」

蔣怡學廚藝，得到老公及囡囡支持。

蔣怡有意回港後開私房菜分享美食。

親子班教下廚

向來有主持飲食節目的CoCo，預告回港後大展拳腳，主意多多的她更打算開私房菜分享美食：「老公成日叫我開私房菜，我覺得都係一個選擇，因為我係鍾意表達嘅人，我想分享我嘅美食畀人知。」她亦不排除會擔任親子班導師：「我想大家知道小朋友可以入廚房，有時我喺屋企整Macaron，都會叫埋囡囡一齊篩粉，我覺得係好好嘅溝通方式嘅親子活動。」CoCo又透露有意追仔，讓囡囡有個伴。

攝影：劉智源

場地：Hide n" seek

服裝：TOPSHOP

髮型：Roy Yan @ Queen's Private i

化妝：Chris Chan @ Summer Shell

文：專案組