黃心穎難題考巨星 發哥轉做開心醫生

被網友封為心穎BB的前港姐黃心穎對發哥有讚無彈：「我好欣賞發哥首先好錫老婆，雖然係Super Star，依然好親民，對我哋後輩係一個好好嘅榜樣，另外我覺得你好關心香港，呢樣係令全港人好驕傲，畀好多正能量大家。」

發哥：「呢個又啱嘅，你喺自己屋企，周圍都係自己人嘛！就算係特首、有錢人，都係隔籬鄰舍之嘛！有啲直頭打開隻窗都握到手啦！香港地邊個舊時唔係徙置區出嚟？有咩咁巴閉，大家都係同一隻船，獅子山下，擔泥擔水嘅人出身，唔使為我驕傲，我驕傲你多過驕傲我自己。」

放大圖片	心穎BB對發哥有讚冇彈，獲得發哥的神級回應時更開心大笑。

然後心穎BB幾乎港姐司儀上身，連問發哥幾條高難度問題：「如果你唔做演員或者攝影師，最想做咩工作？」

發哥：「我幾時做過攝影師？我都冇揸過機，如果我唔做戲，咁最好就係返去做農夫啦！依家啲田貴過啲屋呀！搵到食o架，但一定要有機，有機先賣得錢。」

講嘢口音好得意

心穎：「如果你要同一個人或一樣嘢對換身份一日，會揀咩？」

發哥：「嘩！呢條問題，好有興趣！係話做48小時定24小時？都冇所謂！我想做個『開心』醫生，真係劏開個心，幫人搭橋，醫番好人，咁呢個『開心』醫生真係好開心！我想做醫生做一日！『開心』喎！開完佢唔死得我就更加開心，死咗冇辦法啦！哈哈！我都盡晒力啦！我真係好想做個『開心』醫生！」

心穎大讚發哥口音Cute爆，答案特別，開心獲發哥回覆：「我估唔到發哥真係會答我啲問題，受寵若驚，佢好得意，講嘢時有口音，唔知係特登玩定點，好Cute，佢嘅回答幾特別，我當時諗自己就係做雨水，周圍去其他地方，然後一滴一滴跌返落嚟，然後做雨、做飲用嘅水。」

文：陳偉立

採：林希孺

攝：秦健輝、司徒國榮