Bobby討公道 多謝正義發聲
本報昨日披露有無綫「福將」之稱的歐陽震華（Bobby）竟不獲公司續約，更受到藝員部回覆「有啱先搵你」，事件令管理層震驚。而Bobby昨獲悉有人力撐自己而感到大家有正義感，雖則樂易玲強調是言語間誤會，最後都要由曾勵珍親自安撫，並跟Bobby傾約，聲稱會錫住他。
爆出不獲無綫續約事件後，身為事件主角的Bobby昨稱很多人有正義感：「估唔到咁大回響，好多人戥我唔抵為我發聲，同好有正義感，有啲嘢要講清楚理由！（唔開心？）冇，我只係想攞番個公道，心理上都平衡吓，亦都唔想畀第三者隨意演繹我嘅說話畀無綫知！（曾勵珍依家全權負責同傾約會答應？）簽唔簽都冇所謂，我都係啱先接，最緊要合作過程愉快，等如傾生意，我唔係抓撈！」
視他為受保護動物
Bobby不獲續約有傳令管理層震驚，派出戲劇製作總監曾勵珍出面與Bobby傾約。她昨日接受電話訪問也直認親自與Bobby傾約，她說：「一直都傾緊，亦有同佢經理人聯絡，Bobby係唔高興一啲嘢啫。（佢道氣消咗未？）唔知喎！我都叫佢唔好傷自己身，唔緊要啦，都係言語上嘅嘢，冇乜嘢嘅，我睇住佢大會錫住佢。（Bobby續約有冇特別要求？）冇，佢好易話為。」曾勵珍坦言會找適合劇集給Bobby演，還會當他如受保護動物看待，她說：「都係為佢而做，之前佢身體唔好，都同監製講要睇住佢，好似小朋友、年長演員咁，佢哋係受保護動物，大熱天時都唔會開古裝畀佢。」
「可能言語間誤會」
而製作資源部總監樂易玲昨日回覆有關Bobby不獲續約一事，她說：「我點會唔想簽Bobby呢？當日我跟同事去見Bobby經理人，一齊傾續約細節都未傾完，件事都未完，我就從冇聽過亦唔相信有同事講過『有啱先搵你』呢句說話，我估可能係言語之間嘅誤會，（曾勵珍跟進？）我哋會再約Bobby傾合約細節！」
而陳豪昨與蔡思貝、許亦妮、李佳芯、莊思明等出席新劇《潮流教主》拜神活動時，對於Bobby竟不獲無綫續約，他亦愕然謂：「Bobby以前已經係大哥、忠臣，我都好欣賞佢，咁耐以嚟都係睇佢嘅劇長大，如果不獲續約真係好可惜。」
文：影視組