梁漢文操弗：前後齊露
梁漢文（Edmond）昨舉行演唱會記招，獲多位好友拍片祝賀，其中張衞健更重口味地謂想看他把閃石T-back調轉來穿！而神秘現身的陳奕迅太太徐濠縈更即席幫Edmond度三圍，送上「營養餐」幫他練大隻，而他更預告到時會驚喜騷肌：「前前後後一齊露晒！」
歌手梁漢文（Edmond）昨日為《紅館中場表演2015》演唱會舉行記招，在銀樂隊伴奏下型格十足現身，更獲多位好友拍片祝賀，包括歌神張學友、陳奕迅、蘇永康、張衞健、劉浩龍（師兄）、林敏驄等，談到想於演唱會上見到Edmond表演甚麼，學友指想看他跳火圈，張衞健就謂：「我想睇佢着閃石T-back彈琴，不過係調轉嚟着，條線喺前面。」極之重口味！嚇得Edmond看完片段後要抹汗補妝。
徐濠縈度三圍嫌瘦
之後代夫出席的好友徐濠縈化身徐醫師神秘登場，更即席幫Edmond度出36、29、36的三圍！她卻嫌太瘦，特地送上「營養餐」巨型菠蘿包和大杯牛奶幫他練大隻，徐濠縈更笑言：「食呢啲唔怕肥，演唱會要好大體力，睇我屋企嗰個（陳奕迅）就知。」之後Edmond即席飲奶，眾人又進行切包等儀式。
事後Edmond接受訪問，問到會否聽張衞健所講調轉條T-back着？他即笑言：「即係佢覺得嗰條嘢係可以遮到我嘅？定覺得唔需要遮呢？（會唔會考慮吓朋友嘅意見？）會考慮嘅。（自己極限係咩？）你覺得倒轉T-back嚟着仲唔夠極限？咁真係吊吊揈啦喎。（咁多建議邊樣最大成數會做？）我諗師兄講嘅可以諗吓，着絲襪叉晒啲腳毛出嚟唱《衣櫃裡的男人》，不過個演唱會好似愈講愈核突，唔好搞到冇人嚟睇。」但他亦感謝多位朋友送上驚喜。
七位數搞激光效果
Edmond亦透露演唱會有特別的激光效果：「今次都不惜工本去投資視覺效果。（幾多位數字？）呢個都好恐怖，起碼有七位數字。」一直有操弗的他亦表示到時會騷肌：「指定動作，唔騷唔得啦。（會唔會好似上次咁露股？）前前後後一齊露晒！（老婆肯？）佢有份搞衫，上次露半股都係佢諗，今次佢都會幫我設計衫。」他亦表示屆時會邀請一位神秘女嘉賓：「佢會有好重要嘅表演，係佢從未做過嘅，但要保持神秘。」