鍾健威被艷遇嚇親
主持鍾健威（Ray）日前與有線完約後，即化身「背包客」單拖出走雲南，足迹更遍布麗江、香格里拉及瀘沽湖等地。Ray更自爆途中「艷福不淺」，惹來「小新娘」爭相下嫁：「我去到瀘沽湖呢個女兒國時，有幾個當地人跑嚟讚我好帥，又話要帶個女畀我相睇，結果囡囡最細得5歲，我當場嚇親，同行朋友仲起哄叫我留喺當地添！」
問他有否買手信給緋聞女友黃美棋？Ray笑言對方一早落order：「佢喺我出發前上網睇晒有咩手信好食，又叮囑我一定要買鮮花餅，結果我背包冇位，惟有上機時將包餅夾喺腋下帶返嚟。（淨係買畀美棋？）係呀，佢比較惡嘛！」