阿叻重返聖若瑟：讀多幾年做埋特首！
藝人陳百祥（阿叻）與歌手關楚耀（Kelvin）為母校出力，除參加足球友誼賽外，更重錄校歌及拍MV；現在娛樂圈獨當一面的阿叻，自爆當年因顧住孖好友譚詠麟夾Band而荒廢學業，自信讀書少可「行行出狀元」，如多讀書更叻到可做特首。
阿叻與關楚耀、體壇精英包括前香港足球先生山度士、前香港足球代表球隊隊員陳志康及朱兆基，昨日以校友身份回聖若瑟書院母校出席「明星/球星/舊生校友友誼足球賽」，該校培養出不少社會精英，演藝界的方力申、許廷鏗、陳奕迅、趙增熹、丁子高、劉浩龍；名人界有徐子淇的老公富商李家誠及「光纖之父」高錕，可謂人才輩出。
自閉匿樓梯底
阿叻在足球賽中，跟體壇精英山度士、陳志康及朱兆基及校友落場踢波，他自豪謂曾為學校在足球比賽中獲多個獎項，現再回母校有重拾學生的感覺，自爆非乖學生的他謂：「讀到中四就喺酒吧表演，同譚詠麟唱歌後仲荒廢學業添。」愛認叻的他亦感恩稱：「不過我中英數都喺度學，由我讀小學到中學一半都有咁嘅成就係學校畀，如果我讀多幾年書可以做埋特首。」阿叻大讚學校發掘不同類型人才，鼓勵學生要多方面嘗試，又認叻話：「學校出咗好多Band，當中以我最出名。」至於Kelvin雖沒有落場踢波，忙於為母校拍宣傳片，同愛踢波的他表示：「讀書時踢波曾懶型咁傷到條頸，要入院治療。」又指讀書時有點自閉，午飯時更愛一個人匿在樓梯底食。
重新灌錄校歌
談及香港演藝人協會疑有人「穿櫃桶底」失600萬營運費，阿叻力撐好友兼協會前任會長曾志偉：「曾志偉從來唔識理財，唔關佢事，每個機構都會有疏忽，請一個好或唔好嘅職員，係冇人預計到，我冇理過。」另外，同是校友的英皇高層Alex Fung接受電話訪問時表示，為慶祝母校140周年校慶，將重新錄製新校歌：「由趙增熹同管弦樂合作，陳奕迅、許廷鏗、方力申等會獻聲。」
文：音樂組