Amanda S.禁家人出街
法國首都巴黎前日有三名槍手闖入雜誌辦公室大開殺戒，昨日更有女警因槍傷致死，事件震驚全球，不但外國藝人怒轟事件令人髮指，即使遠在香港的一眾圈中人也大感心痛！其中有法籍血統的名模Rosemary和Amanda S.對事件大為緊張，更第一時間聯絡居於法國的家人！
巴黎近日發生的槍擊案造成多人死亡，一眾在港的法籍模特兒擔心當地的家人安全，Rosemary聽到消息表示震驚：「受害者係傳媒，大家都有言論自由，無論點， 咁樣做係唔啱。我喺嗰度生活嗰陣，都未見過有槍擊事件，我覺得法國好安全。（打畀家人？）有，佢哋冇人喺巴黎，有個堂哥做警察，我都有啲擔心，不過做得警察已經有好多訓練，我相信佢能夠處理到。」另外，Amanda S.亦對事件感到傷心：「好擔心，我有屋企人住喺巴黎，有我爸爸、auntie和姪仔，好恐怖，死咗咁多人，今日都打電話返屋企，叫佢哋小心啲，盡量唔好出街住。」
任達華仍睇好樓市
至於有物業在法國的影帝任達華則直言擔心當地市民的情況，尤其他們的心理狀況，但不會對自己的物業感到憂心，因他依然睇好樓市：「不過依家最大心願係『世界和平』！」越南、法籍藝人黃長興則指因多年前已覺法國治安不佳，他的父母、家人已回流香港，但因仍有朋友在當地生活，所以都會留意事態發展。
朱璇與友保持聯絡
曾於法國留學、父母亦曾於當地居住的前華姐冠軍朱璇，對事件同樣大感傷痛，她說：「聽到呢啲消息真係好難受，民主國家唔再自由！」朱璇跟身在法國的朋友每日也會在社交網站保持聯絡，朋友們亦會告知她當地的情況，但朱璇直言在當地的朋友起初不感特別害怕：「佢哋開頭覺得係個別事件，但依家局勢愈嚟愈唔穩，佢哋都盡量唔出街。（法國治安點？）一向都麻麻，以前喺法國，我細佬都試過畀人扒過兩次銀包。」