諸葛紫岐 公主放笑彈
名模諸葛紫岐（Marie）嫁入豪門變身「薛王妃」，去年更誕下金叵羅，幸福滿溢，是女士們夢寐以求的生活，但她卻突然宣布加盟英皇電影，並將投入電影拍攝，令人甚為不解，理由其實很簡單，這就是她「想做就去做」的性格，還揚言希望在電影圈以「笑星」闖一番。
諸葛紫岐（Marie）從小嬌生慣養，巴士港鐵都甚少搭，旺角亦未去過，被指「公主病」。而幸運之神一直守護着她，2012年與Neway太子爺薛嘉麟結婚，老公錫到佢燶，之後還為薛家誕下金叵羅，生活安穩富泰，以為她安心做少奶奶，但產後不足一年，卻又宣布加盟英皇電影，還會向電影、電視兩方面發展。問她為何有此計劃？她說：「我之前都拍過電視劇，一直覺得好有挑戰性，最重要可以演繹不同嘅性格，經歷唔同嘅人生，係一個好好嘅體驗。（係咪由細到大都想做明星，所以想圓自己嘅明星夢？）我唔係發明星夢嘅人，我只係想做就去做嘅人，突然諗到就一定要去完成，好似去旅行，諗到想去邊，就即刻要去，唔會諗咁多嘢。」
好多劇本睇緊
Marie雖然還未正式「開工」，但已忙得不可開交，一個月之中有一半時間不在港，不停飛見不同的人傾電影及電視，她說：「我依家手上有好多劇本睇緊，電影同電視劇都有，見我嘅人有啲好鍾意我，因為我係新人冇被定位，可以有好多嘗試。但亦有啲會驚，因為我冇乜點拍過嘢，經驗不足，有導演、監製見到我，第一句都係問『拍戲好辛苦，你得唔得』，喺佢哋眼中，我畀佢哋感覺喺溫室長大、嬌生慣養嗰種，佢哋擔心我做唔嚟。」
樣靚身材正加入電影圈，離不開做「花瓶」，但Marie謂：「花瓶都有佢嘅價值，每個人喺世界上生存着都會為自己想做嘅嘢奮鬥，不過唔可以太長久，都想作多方面嘅嘗試。」被問到最希望做甚麼角色，她二話不說指要做「笑星」：「我其實好鍾意笑，希望拍多啲笑片，笑片可以帶畀大家歡樂，笑多啲人都健康啲，啲人睇戲都係為咗輕鬆吓，最緊要開心。不過啲導演唔覺得我好笑，個樣亦唔搞笑，但就算要我醜化自己去搞笑我都冇所謂。（好似趙薇、莫文蔚喺周星馳電影裏面咁醜都得？）咁又未必去到咁盡，不過都可以試吓，但一定唔可以冇頭髮，頭髮對我嚟講好重要。」
信佛拒拍鬼片
雖然想試不同的角色，卻又有堅持不做的角色，並不是拍性感角色，而是拍鬼片她一定不能接受：「因為我信佛，所以唔會拍鬼片，同埋功夫片對我都有難度，我有自知之明，平時都唔係好做運動，所以體力未必應付到，唔想勉強自己咁辛苦去做。」
Marie可隨心去做想做工作，老公薛嘉麟百分百的支持，令她更放心，她說：「老公好支持，佢本身就係一個工作狂，亦覺得女性都要有自己嘅事業，拍戲都係一個工作。我做嘢佢仲開心，佢唔使特登陪我，佢好忙，影響到我覺得我應該要忙啲，咁先會充實啲。」
湊仔學會放鬆
Marie透露除了電影，還會拍電視，而且有不少將在大陸拍攝，如果一旦投入電視拍攝，最少幾個月不在港，囝囝還不到一歲，她是否能捨得？Marie說：「如果幾個月唔見當然唔得，我一定會抽時間飛返香港見佢哋，到時睇時間點分配，我依家都好忙，但星期六、日都會家庭樂。BB初初出世時，我乜都唔識，好多嘢都過分緊張，個責任感好重，依家調節咗，以前BB玩得太耐覺得要瞓覺，就逼佢一定要瞓，但其實BB都有自己生理時間表，佢玩到攰自己會瞓，唔使太過勉強，我學識咗要放鬆去面對，唔好吓吓都緊張。」
出碟一波三折
Marie婚前曾透露會出唱片，但最後只聞樓梯響沒有下文，她直言與出碟沒有緣分，暫時不會強求，她說：「初初諗住喺日本出碟，但當時中日關係緊張，又遇着地震，所以取消。後來結咗婚，老公嘅公司話同我出碟，我都好積極去揀歌，點知又有咗BB而冇出到，我覺得呢啲都係天意，唔好勉強，將來先再算。」
採訪：Jessica Lam
攝影：黎志輝
化妝：Krise Wong
髮型：Eve Chiu@Queen's Private i
服裝：Opening Ceremony@I.T，Kenzo@I.T
場地：灣仔吟彩日本餐廳