黃俊銘感恩 撐父愛之切

從加拿大回流的「星二代」黃俊銘（Dixon）一直與爸爸夏雨同居，雖然兩父子間中為生活細節有小爭拗，但Dixon笑言爸爸絕非嚴父，二人相處反而似朋友：「佢對我嘅生活好放鬆，只要唔好學壞就得。有時睇電視睇到我做嘅節目，佢都會用朋友嘅方式同我講番有咩問題，等我冇咁大壓力。」

監場有壓力

一心想做演員的他現時卻擔任娛樂主播，全因爸爸的悉心安排，他說：「因為我對鏡頭太green，連講嘢嘅方式同節奏都未拿捏到，咬字唔夠清晰又唔識執生，所以爸爸就叫我做主播鍛煉口才先。」

早前參與父親監製的電影《ATM提款機》的Dixon更深深體會到其苦心，他說：「當日場戲拍我結婚，所有演員都到齊晒，如果我一NG大家就冇得收工，所以搞到我好大壓力。一開始試嘅時候，Daddy直頭企喺我隔籬睇我做成點，令我好緊張，對白講到好生硬，然後佢就當住所有人面前講：『你講到咁樣，我求其搵個人嚟講都得啦，使乜搵你呢？』」

曾心情低落

Dixon坦言曾為此而心情低落，但事後回想反而感激父親的「惡言」：「自己唔開心就一定會有，不過之後諗番畀自己Daddy鬧，一個真心為你好嘅人鬧，總好過出去畀其他人鬧。」

攝影：吳文聰　

場地：[PRIVATE] SQUAD Fitness Studio

文：專案組