杏兒勁顯眼 子珊靠邊站
無綫昨晚舉行節目巡禮，出動逾二百位藝員向廣告客戶大晒冷。除視帝后大熱黎耀祥、郭晉安、佘詩曼獲安排站於顯眼位置外，盛傳約滿離巢的胡杏兒，所企位置竟比徐子珊更筍，無綫寧犧牲子珊靠邊站，也要盡最後努力挽留杏兒！
黎耀祥、佘詩曼、郭晉安、胡杏兒、陳豪、歐陽震華、馬德鐘、鍾嘉欣、徐子珊、薛家燕等逾二百位藝員，昨晚出席將軍澳電視城《2015無綫節目巡禮》，與一千位廣告客戶近距離接觸，落力為明年廣告柯打冧客！姐仔沈卓盈、宋熙年、朱晨麗、王君馨和已為人母的呂慧儀等性感示人，大受歡迎，已上位的高海寧、苟芸慧則惜肉如金。
張繼聰代Kay宣傳
無綫今年一改慣例，不再印製宣傳冊子派予客戶，又不再在巡禮上播片花，播的全是已落實演員陣容的劇集片段或拍攝花絮，如陳煒在《梟雄》中的誘人大露背，蔡思貝及吳若希在《衝線》中錫錫羅仲謙等，並改派小生、花旦即場做短劇，以現場感及蝦碌代替「罐頭」宣傳片冧客，其中萬綺雯為歐陽震華揼住骨出場介紹《東坡家事》；馬德鐘以古惑仔造型宣傳《以和為貴》，他說：「落廣告有桔送！」同劇的徐子珊則說：「送桔，out喇！送TV Buddy，炒o架！」不過拉出海報時卻倒轉了(火羅)到爆，但氹得客戶哈哈大笑。當介紹由謝安琪（Kay）及鄭嘉穎的新劇《殭》時，兩人均缺席，即安排Kay的老公張繼聰及嘉穎老友黃智賢、羅蘭站台，張繼聰專業地sell客說：「認住TVB，廣告落多啲！」
佘詩曼霸氣贏晒
全台藝員排排企大晒冷見客戶時，除視帝后大熱黎耀祥、郭晉安、佘詩曼獲安排站於顯眼位置外，盛傳約滿離巢的杏兒，所企位置比徐子珊更筍，無綫似盡最後努力挽留杏兒！以古裝look與黃浩然及張致恒宣傳《呂后》的阿佘，是該劇唯一女主角，獨領風騷，但張致恒開口夾着脷，將「世人」講成「西人」，倒阿佘米。阿佘對於獲無綫厚待，常由她打頭陣，她說：「係咩？多謝。（視后呼聲高？）兩回事，都未公布入圍名單，有鍾嘉欣、蘇玉華、田蕊妮咁多對手。（TVB重視你，出年《呂后》孭晒飛？）我冇特別留意，今晚好開心參加盛會，未試過着古裝做present。（杏兒離巢？）點解呀？每個人有不同階段，開心就得啦！」慘被犧牲的子珊揚言不會不開心：「我個位同以前差唔多，咁多年都係企馬國明隔籬。（TVB明益胡杏兒？）佢早過我入行，係我前輩，呢啲等公司安排。佢唔好離巢啦，多啲人留喺公司，我份約仲有排至到期！」
黎耀祥來年有兩劇在身，他認為最特別在《公公出宮》與蔡少芬及姜大偉合作，對無綫力捧，視帝大有機會？他謙說：「好多對手，不過《名門暗戰》我好鍾意，呢個時勢收視好難保證，望觀眾有好評價！」而楊怡更吃香有三劇在身，堪稱花旦王。黃翠如、黃宗澤及梁烈維則暫未有劇在身，令人詫異。
文：影視組