鍾嘉欣谷視后：唔會公開戀情
鍾嘉欣與男友伍允龍踏入七年之癢，女方事業愈見出色，今年更是視后熱門，逐漸浮面的戀情都要先行讓路，早前兩人結伴出席飯局亦毫不鬆懈，嘉欣一見男友手多多掃背，即使出「河東獅睥」，令伍允龍無癮早走以防被亂寫，而力催獎運的嘉欣更揚言「唔會公開戀情」！
入行十年的鍾嘉欣與動作演員伍允龍的七年情近年漸見浮面，今年嘉欣憑新劇《大藥坊》被視為視后的大熱人選，知情人士透露她因此與男友約法三章，保持距離。兩人日前被《好報》踢爆孖住出席友人的生日聚餐，與同公司的王君馨和陳法拉舊愛薛世恒等共三男三女同枱食飯，坐在女友旁邊的伍允龍相當識做，一直飲悶酒甚少發言，兩杯落肚後，他開始不為意地增加與女友的身體接觸，手多多對女友搭膊頭、餵小食，見嘉欣有幾聲咳更順勢輕掃其玉背，嘉欣立刻使出「河東獅睥」以示不滿，伍允龍見狀無癮離場，一支公在尖沙咀閒逛半小時才轉乘港鐵回家。
王君馨拒戀薛世恒
嘉欣昨到電台受訪，被問到在飯局中怒睥男友一事，她解畫說：「咁啱影到個表情啫，嗰晚係朋友生日，應該只有開心嘅成分，冇怒脾成分。」她又稱因不想被亂寫，伍允龍才早走。嘉欣強調暫不會公開戀情，暗示伍允龍要繼續做「背後的男人」！問她是否怕感情生活影響獎項？她直言希望今年輪到自己有獎運：「每年評審都唔同，今年可能興喜劇，下年又可能興悲劇，希望今年會興杜佳期（嘉欣劇中角色）。」
另外，飯局當晚王君馨與薛世恒由頭傾到落尾，分別時男方更細心目送王君馨離去，記者致電王君馨，她強調兩人絕不過電：「大家同一間教會先咁熟，唔會有機會，我有男朋友喇！只係當佢哥哥，傾下教會逸事同音樂。」嘉欣亦為好友解釋：「大家都會密密傾，嗰晚好開心大家都係基督徒，可以互相扶持係好好，男女之間其實亦有純友誼。」
文：音樂組