郭富城 不羈雄駒

那一次，就是步入教堂的一次嗎？

說郭富城是舞台王者，絕對不容置疑。在台上是顆耀眼的明星，私底下的城城也光芒四射，懂得品味生活！肖馬的他近年榮升馬主，他說養馬改變了他，甚至整個生活態度都截然不同，他說：「養馬之後，我嘅生活圈子擴闊咗好多，不論同屋企人或者朋友。做歌手比較離群，練舞係好獨立，自己一個人喺排舞室，唔需要同人交流；做咗演員之後好咗少少，識多咗唔同嘅朋友，會同唔同嘅人諗吓電影題材，增廣見聞，但真正令我改變都係養馬之後，因為多咗好多同朋友嘅聚會，聚會裏面我會諗吓食乜好？想點啲好味嘅食物畀家人同朋友分享，發覺自己原來好enjoy呢種生活，令我學識分配時間畀佢哋，唔好成日只係掛住做嘢，要放鬆，同埋分享！」城城自言是個十分重視家庭樂的人，他感激父母的栽培，認為父母的關愛是無人能代替，從而令他反思，自己是否真的盡了做兒子的責任，而不是只單純為了自己的理想而拚搏？

愛駒「愛將」勝出，城城與張智霖齊齊拉頭馬。

城城與熊黛林熱戀七年，惜以分手告終。

喼弗隨時上陣

城城曾經透露希望能在50歲之前成家立室，可惜年前卻與拍拖七年的名模熊黛林分手，結婚計劃會因此改變嗎？他想了想說：「睇天意安排，我自己都答唔到！」感情事向來是藝人的禁忌，城城就是一個好例子。他可以跟你談天說地，風花雪月，唯獨感情事始終有保留，偏偏觀眾傳媒最有興趣的卻是這一點，這就是明星口中常說的「私隱」吧！很多時候，明星都眷戀着被前呼後擁的璀璨歲月，不甘於平淡，這也許是做藝人的「症後群」，城城也有着這個明星症後群，是個典形的工作狂，這種想法與他近乎完美的體態有着千絲萬縷的關連，他笑說：「我隨時都準備要上台，因為我係舞者，所以我一定要keep住健康嘅身體，對我嚟講運動係畢生嘅工作，我要時刻準備迎戰，接受新挑戰！我每日盡量抽時間跑步做gym，每晚都會做最少200下sit up，最多600下，但我唔想太大隻，我只係要有線條，因為跳舞咁大隻係唔方便！」

城城熱愛賽車，成績不俗。	城城時刻保持最佳狀態，隨時準備迎接新挑戰。	城城計劃多多，又以拍電影為大前提。
城城與緋聞女友苟芸慧同場，二人表現專業。

愛火鍋因嗜辣

眾所周知，城城是個超級火鍋狂熱分子，是他得天獨厚吃極不胖嗎？相信這是很多人既羨慕又疑惑的問題，城城自揭答案：「我成日打邊爐係因為我鍾意食辣，只有打邊爐先可以刺激到味蕾，我打邊爐都係素食多，我只係鍾意個辣味，我平時喺屋企食飯都要放碗辣椒。食辣對身體好，有維他命E，其實我一日三餐食得唔多！」城城說他除了是匹「馬」，還是頭夜貓子，晚上是最活躍的時候：「我有好多靈感都係夜晚創作出嚟，因為夜晚好寧靜，我鍾意聽住音樂去諗嘢，當然有時都會同三五知己飲杯酒傾吓偈，我係一個比較夜瞓嘅人！」

賽車比喻人生

刻下的城城依然停不來，計劃多多，但重點會落在電影上，他最希望明年前有個屬於自己的劇本，題材方面可以很大膽，他續說：「其實唱歌同演戲我都一樣咁熱愛，音樂上仲可以有好多突破，但好多音樂同造型都行過，反而電影條路仲好漫長！(想再做影帝嗎？)獎項係一種鼓勵，但最重要係做到自己想做嘅嘢，豐富自己嘅人生，過程係一種享受！」城城又以他同樣熱愛的賽車比喻人生：「我喜歡賽車，喜歡追求速度，當你全神貫注去賽車時，其實從中可以紓緩咗一啲壓力；做人都係，要喺人生發掘自己嘅興趣同目標，努力去做，無論得同失，過程中都係一種享受，總會有得着！」

會女神無避忌

郭富城早前以浪琴表（Longines）優雅形象大使身份出席馬術比賽活動，及後又與緋聞女友苟芸慧一同現身品牌活動，城城更大讚病愈後的苟姑娘狀態大勇，更以「女神」來形容對方，難得二人毫無芥蒂，專業地完成工作！

採訪：Ada Lam

攝影：秦健輝