冼色麗戲癮勁睇淡名利
演員冼色麗（Bonnie）出道六年幾，不能說是「新人」，卻不擔心自己有「七年之癢」，因很享受在銀幕或舞台上所帶來的滿足感，這個小妮子對於「名與利」不會看得太重，仍默默耕耘等待屬於自己的「代表作」出現，令自己在演藝界有個大突破！
唔介意做閒角
不經不覺，我都出道咗六年幾，如果你問我呢段期間對自己成績滿唔滿意？我會答你，覺得自己可以做得更好，係「預期」之內，不過都有少少出入。相信我唔講，大家都唔會諗起，當年我係以歌手身份出道，細個夢想係做歌手，可以圓夢當然開心，我仲出過單曲，之後喺機緣巧合下接觸演戲，慢慢發現我對拍戲好有興趣，仲開始覺得自己適合做演員多過歌手，兩樣我都冇接受過正統訓練，只係邊做邊學。我唔係讚自己，我覺得自己有啲天資，但都要靠自己努力同前輩指點，我相信自己會愈演愈好。
參演大製作
我簽咗英皇電影公司，對未來充滿憧憬，日後都會主攻電影方面，仲可以參演到大製作，雖然唔係主角，甚至配角都稱唔上，但有份演出已經好滿足，我真係覺得自己好幸運。我從來都唔會揀角，珍惜每個演出機會，就算係一個閒角都可以有發揮地方，都有重要性，不過我一定要清楚了解所飾演嘅角色，先至可以演繹得收放自如，做到「人戲」合一境界，哈……
最恨拍愛情片
其實我唔會將自己定型，又冇話要行乜路線，只要我清楚了解角色，覺得自己能掌握到就OK。正如我曾經同衛詩雅拍輯電影《囡囡》有唔少情慾戲，甚至全裸上陣，其實我可以去到好盡，我覺得做演員要投入每個角色，接得就唔好有顧忌，冇話係為藝術而犧牲，或者呢啲就叫做「敬業同樂業」精神。
擅長記對白
如果你問我最想拍邊類型嘅戲？我諗都唔諗會答你：「愛情片」，唔係因為我恨拍拖，只係出道以嚟都冇拍過完整嘅愛情戲，仲要以「男性題材」為主，真係好想試吓！好多時愛情戲都會難抽離角色，往往都會不知不覺愛上對手，可能我性格關係，我好快投入角色，但導演叫停，我就會好快抽離角色，又或者咁講，我記對白好快，消化得好好，但拍完戲我就立刻唔記得！
等緊好劇本
我真係好享受喺銀幕或舞台上表演，拍電影或演舞台劇都好，嗰種滿足感唔係用言語可以形容，我從來唔強求「名與利」，只做好本分，我等緊一個好劇本同導演，令我演藝事業上來一個大突破，而且我好欣賞劉青雲，雖然我哋之前有合作過，但都希望再可以合作多次，可以同好戲之人拍戲令我獲益良多，拍戲過程簡直係「袋錢落我袋」！
開朗甜姐兒
整個訪問過程中，不難發現冼色麗是個開朗率直的甜姐兒，有問必答之餘，又笑個不停，她發放那種「笑聲」炮彈令人感受到一種正能量，她開心果的個性簡直惹人喜愛，就連作為女人的小記都不知不覺地愛上她！
鞋癡買唔停
鏡頭後的冼色麗是崇尚自然，穿衣講求舒服，最愛T-shirt與牛仔褲的配搭造型，不過她卻是個鞋癡，甚麼類型鞋款，只要一個「愛」字就會買下來，說：「我通常着平底鞋同波鞋，但高踭鞋多數儲嚟欣賞！」現擁有逾百對鞋履的她坦言要訂造兩個大鞋櫃之餘，衣帽間亦放滿大大小小的鞋盒，認真估佢唔到！
口述：冼色麗
筆錄：名人組
髮型：Alex（Hair Corner）
場地：TAPA GRIA（尖沙咀）
採訪：劉慰思
攝影：黎志輝