張嘉兒撇正印 戰鬥格氹大隻仔
前港姐冠軍張嘉兒昨日凌晨撇甩男友，穿上戰鬥格貼身低胸短裙，約大隻仔夜蒲，全程風騷的她不停撥弄長髮，及至發現記者拍照，惟恐激嬲男友，火速轉黐女仔堆轉移視線。
張嘉兒自當選2007年港姐冠軍以來，一直被指不夠漂亮，甚至被譏為「豬扒港姐」，但這樣沒影響其異性緣，多年來她曾先後和金剛及鄧健泓等傳緋聞，早前她又自爆和加拿大舊愛復合，兩人愛得甜蜜，並曾到南非預支蜜月。
風騷撥秀髮
正當嘉兒表示視男友為結婚對象之際，昨日凌晨一點她卻被發現撇甩男友，穿白色貼身低胸短裙，以谷胸露腿戰鬥格現身中環，身邊有兩名壯男及兩位女性朋友。
嘉兒與其中一名大隻男相當好傾，兩人並肩而行，大隻男講到眉飛色舞動作多多，嘉兒則不停甜笑撥弄秀髮，相當風騷。
未幾嘉兒發現記者拍攝，即表現愕然，繼而警覺地墮後轉黐女仔朋友，一行人行上樓梯時，大隻男頻頻回頭望穿高跟鞋的嘉兒，盡顯細心。
結婚要拖住
昨日記者致電嘉兒，問到背男友約大隻仔，她說：「男友同另一班朋友去咗韓國旅行，我有嘢做行唔開，有叫佢買護膚品畀我當手信。（驚唔驚男友呷醋？）唔驚，呢班係佢朋友，我幫佢招呼咋。」問到結婚計劃，嘉兒說：「今年我家姐會結婚，我唔可以爬頭，要儲吓錢先。」
文、攝：追蹤組