張苡澂一篤尿 唔見近百萬
曾與名模周汶錡外籍老公當街激咀的歌手張苡澂近日慘變「黑后」，大懵的她先於上月在的士「漏低」十多件首飾，前晚從上海飛抵深圳時，人有三急將行李交託女傭看管，但所託非人，累她損失近百萬財物及證件，認真禍不單行！
2008年入行的張苡澂（Venus）星運平平，至09年爆出與周汶錡法籍男友Julien Lepeu街頭「狼咀」鬧出「小三」緋聞才稍有知名度。2010年嫁作闊太的她生活富裕，但不改「騎呢」本性，上月她突然在微博留言表示遺留十多件新買的首飾在的士，由於沒取的士發票，難以追尋，令她心痛不已。
失證件缺席港活動
不過，Venus似乎仍未學精，昨午她本要出席西九龍舉行的活動，大會突然通知傳媒Venus因遺失證件滯留內地，無奈缺席，記者致電她查問，Venus透露在機場疑被偷手袋及行李，因證件放在手袋未能過關出席活動，最終要報公安處理。
Venus詳細講述財物不翼而飛經過：「趁復活節假一個人飛去上海探哥哥，尋晚（前晚）飛返深圳，當我攞完行李行去大堂，因為尿急將手袋同行李交畀『工人姐姐』睇住，點知出到嚟啲嘢冇晒，只係見到『工人姐姐』手挽住嘅唔係我個手袋。」Venus表示第一時間打開工人姐姐手上的手袋，發現內有不少文件，惟有交給航空公司職員善後。Venus估計遺失財物總額近百萬，最心痛是損失兩個價值10多萬的名貴手袋：「手袋入面有兩部電話、一隻數十萬鑽石戒指、一隻10幾萬鑽石錶，仲有證件、銀包同現金，行李入面仲有個近十萬嘅細手袋。」
有情有義拒炒「姐姐」
不過，當問到會否炒失職工人姐姐魷魚時，Venus嘆氣說：「唉，我係佢第一個僱主，太新喇。」暗示不會開除工人，可謂有情有義。她坦言第一時間通知在港的億萬富二代老公：「佢第一時間幫我補領番電話卡。（叫佢補送鑽戒？）唔知，睇佢想點，不過佢都有話我去旅行唔應該戴鑽石戒指同鑽石錶。」問她為何將鑽石戒指及鑽石錶放手袋？Venus解釋：「因為要過海關嘅金屬探測拱門，所以除咗放喺手袋。」據知，Venus昨晚已成功辦理臨時證返抵本港，並會出席今早舉行的活動。
文：音樂組