田蕊妮 鄭嘉穎拒為錢苦惱
田蕊妮與鄭嘉穎結緣於3年前一套劇集，拍攝期間已打成一片反轉片場，雖然二人完成該劇後甚少聯絡，但偶然碰到也會有說不完的話題，互相交流人生閱歷，阿田自爆曾揮霍金錢滿足欲望，但反省過後只想過簡單又滿足的生活。而嘉穎則指以往為生活不能選擇工作，但現時認為財富對他來說並非重點，出外漂泊幾年的他也想找個伴穩定下來，還爆母親心急想湊孫！
拍劇擦出火花
田：記得同你拍劇集《Only You只有您》熟咗，幾欣賞你係個幾真性情嘅人。
鄭：大家性格幾似，唔會人前人後兩個樣，有咩會拎出嚟講，唔會針對人。
田：最初啲人話你小器，叫我講嘢小心啲，到識你覺得你個人幾真。
鄭：嗰套劇成班人都玩得，去到邊嘈到邊，係開心經歷，套戲畀到我有啲啟發。
田：咩啟發？娶老婆應該娶我呢啲？
鄭：絕對唔係，好少做hea角色，嗰套就係。
田：hea到條褲穿咗窿都唔去服裝間縫番，之後畀我哋不停撩。
鄭：我現實都係咁hea，只不過《Only》劇係開始，令我之後喺《怒火街頭》個角色冇負擔，可以放大10倍來演，將平時自己乞人憎嘅一面放晒出嚟。
田：點解攞獎冇多謝我哋？
鄭：因為我有好多人要多謝，我有多謝監製王心慰，佢係我嘅伯樂、人生好重要嘅女人。
田：其實同你嗰次之後都冇再合作，平時又冇contact，唔會諗友誼真定假，但亦唔需要不停打電話。
鄭：公司見到o架嘛，我同女仔好少可以講真心話，同你感覺上唔使掩飾，所以好想同你再拍多次。
田：你依家咁紅，突然間好似有個承諾咁，叫我畀兩年時間你。
鄭：依家都未過兩年，我幾欣賞你個人，因為你做戲好natural，感情戲好真。
田：以我理解中人最珍貴係真感情，唔可以模仿，每個演員都有真嗰方面，好幸運喺我演員生涯入面，認識到好對手令我打開真嘅一面。
盼望活得簡單
鄭：今年下半年回歸香港，返嚟拍劇唔係為錢，要件事吸引。
田：你依家有咩目標，生活上冇擔憂？
鄭：以前好多嘢都冇得選擇，依家可以揀鍾意做嘅嘢，經濟上我OK，照顧到家人，開心好多，enjoy工作，我唔會退休，冇嘢做好慘。
田：如果人有得選擇係開心事，可以過簡單又滿足嘅生活。
鄭：我好易開心，食飯盒都OK，冇車都得，雖然鍾意法拉利，但唔會用4百幾萬去買，點解唔用嚟畀首期？
田：我以前都push老公，想追求鑽石、名牌袋，老公（杜汶澤）都有段時間係，試過唔知自己有幾多架車，不過過咗呢個階段。
鄭：依家你明白財富有就有，唔需要話有幾多。
恨結婚做爸爸
田：信仰都令我哋有大轉變，做嘢有選擇性。你依家想唔想拍拖？
鄭：想，身邊朋友已結婚，有啲離婚，呢方面我比較遲，希望搵個同自己可以白頭到老嘅人，但我圈子識來識去都係劇組人，點解唔同演員拍拖？我又唔係要好靚嘅女仔，性格好緊要，好似你咁爽朗嘅又封晒盤。
田：你要好性格就唔一定靚女，世界好公平。
鄭：到80歲又會靚得去邊？所以追求實在嘢，我唔反對佢靚女，一切都係由樣貌開始，一開始唔啱就唔好浪費大家時間，阿媽話過幾年未必湊到小朋友，叫我生個孫出嚟，因為家姐唔生。
田：淨係生仔畀阿媽湊。
鄭：女人點會肯齋生仔，代母又要過到我關先得，再過幾年都係咁就唔排除，我都想要小朋友。
田：我老公係好真嘅人，表面上好難睇佢真定係講笑，覺得佢係戴住面具，其實佢係攤晒出嚟畀你睇，入行到依家都係咁真，有時我都會驚，可能以前我唔夠相信身邊人，好緊張佢事業，唔想再畀壓力喺佢度，出去做嘢都要諗我點，其實最緊要佢開心就得。
鄭：一齊信佛同經歷過先有呢個選擇？
田：有段時間老公突然嘭一聲跌落嚟，我跟住佢都迷失，唔知自己做緊咩，過咗幾年少奶生活，食完tea跟住打牌先去瞓，後來真係冇晒錢，就諗係咪行得太快呢？
後記：玩到癲差啲喊
眾所周知阿田乃性情中人，玩起上嚟確實瘋狂，嘉穎透露當年拍攝《Only》劇期間，曾試過玩到差點令阿田哭！話說當時大家玩到打來打去，為免殃及池魚，嘉穎已先行走埋一邊與李司棋傾偈，沒料司棋姐一走開，阿田卻鬼祟地走過去打他，嘉穎謂：「我自然反應一個side kick撐你腳嘅『上５吋下５吋』，之後你成個人瞓低去個茶几度。」
阿田哈哈大笑謂：「講真我真係有少少呆，因為好瘀皮，好想整蠱番你，其實個廠已經習慣我哋咁玩，心諗咁(火羅)應該做咩反應好，咪扮喊囉！」
筆錄：影視組
攝影：沈健程
場地：Grand Central Bar and Grill @ Elements