湯盈盈核突舐阿滕
藝人滕麗名、湯盈盈、薛家燕昨日穿上中式裙褂，到將軍澳宣傳無綫劇《新抱喜相逢》，大會更為阿滕慶牛一，盈盈忽偷襲往阿滕面上捽生日蛋糕，令阿滕變花面貓，盈盈事後孖阿滕合照，扮friend主動握手，又忽然用舌頭舐阿滕塊面，阿滕大叫：「你好核突呀！」阿滕之後說：「同盈盈識好耐，拍劇佢玩吐口水、放屁，OK啦，熟呀嘛！」
今天生日的阿滕續說老公早已識做：「佢送咗份我想要嘅禮物畀我，但我唔會講係咩！（叫埋老公去劇集首播飯局？）未覆我。（怕湯盈盈蝦佢？）佢怕醜啩！」盈盈則笑謂新劇收視好會穿三點式：「25點就着比堅尼，但着喺裏面，唔除（面衫），費事老公鬧！」薛家燕則透露年初二搞「溝通團」：「諗住仔女同我自己帶埋『朋友』旅行三日，試吓相處。」
