曾志偉：流會合情合理

志偉昨甫落機，即趕往出席公開活動，當得悉演藝人協會改選出現流會情況，會員之一的邵音音隨即在自己微博留言，質疑有人獨大，「出橫手」阻止其他人當選會長，志偉顯得無奈，回應表示：「落機先知（流會），不過唔係一個人決定，佢哋call咗副會長三哥（苗僑偉）返嚟，係成個委員會決定，合情合理嘅。其實流會都唔係第一次，以前試過選咗21位理事後，都要流會擇日再選會長。」

撐秋生做會長

對於邵音音指「出橫手」問題，志偉說：「唔會，如果係咁就應該即刻推選（會長），咁樣陰謀論係咪會大啲呢？無論如何根據會章，23日之前點都要選，至於我以後就可有可無，變咗榮譽會長，可以出席會議，但冇投票資格。」

秋生氣憤難平，揚言另立新會。

身為秘書長的陳芷菁按本子辦事。

提到秋生被「拒諸門外」，志偉解釋：「佢嘅班底好多人都未登記成為會員，要補番入會先得。（秋生當選會長成數好高？）應該係。」事後記者再轉告志偉秋生投訴不獲尊重，抵達會址兼帶備會費做相關續會手續，最終得個「吉」，令他氣憤難平，激動起來更揚言要另立新會，志偉答：「有啲會員想根據約章辦事，有啲程序唔係即刻得，不過我認有同秋生講過，法律不外乎人情，去到有得搞嘅，大家嘅爭拗點喺呢度。（秋生話冇得入去會址呀。）唔會。（佢話自己搞新會，叫你去做番演協喎。）我會打電話同佢了解吓，安撫吓佢。」

傳邵陳有積怨

整件事看似不應牽涉到已辭任會長的志偉頭上，最終他依然被搞到頭痕，據悉最大的問題源於入會時間的爭拗，有指秘書長陳芷菁一早已通知秋生要預先填好表格，以及完成相關程序，好讓他們有足夠時間處理，奈何秋生仍選擇「臨時踩場」，堅持希望即場完成相關手續，陳芷菁則企硬一口拒絕，令雙方即場鬧得很僵。另外，昨日秋生現身時更偕同大批未登記成為會員的藝人同行，資深演員梁珊見狀，不留情面開聲：「我哋開會，請你哋離開啦。」令氣氛雪上加霜。至於邵音音方面，則有傳她與陳芷菁素有積怨，今次問題難免令雙方誤會加深。

文：影視組