余文樂勸少飲 Kary：關你咩事！
城中一眾名人前晚紛紛出席I.T時裝派對，造就圈中不少緋聞情人撞到正，包括梁朝偉、張曼玉，林德信、松岡李那，至於舊情人余文樂和吳雨霏（Kary）同場相見，樂仔好言叫Kary飲少啲，換來她一句：「依家關你咩事啫，你講我就要聽o架嘞？」
前晚I.T舉行廿五周年派對，廣邀城中名人明星出席，韓國當紅男團Big Bang成員G-Dragon與Tae Yang亦應邀成為座上客，圈中不少新舊緋聞情人在派對同場相遇，當中包括因合作電影而傳過緋聞的梁朝偉和張曼玉，兩人再度碰頭，在場內卻各有各玩，分別成為「集郵」目標，不停被包圍影合照，未有趁機敍舊。
長髮女咬耳仔
至於分手不久的樂仔和Kary同場相見，甩拖後保持友好關係的兩人被目睹互相打招呼，繼而並肩傾偈，有人聽見樂仔向拿着香檳的Kary說：「唔好飲咁多啦！」她聞言笑了笑，半認真地說：「依家關你咩事啫，你講我就要聽o架嘞？」自覺沒趣的樂仔哈哈乾笑了兩聲。事實上，樂仔於場內甚受歡迎，不時有女仔埋身要求合照，他舉晒V和大家影相，未幾更有名長髮女上前和他咬耳仔傾唔停。
打得火熱的林德信及日模松岡李那，大部分時間分開玩，不過亦曾情不自禁「合體」，手持香檳密密斟，可能礙於場內耳目眾多，一反平時親熱舉動，刻意保持距離，松岡更遇上前男友Philip Chu，不避嫌頭貼頭合照。於場內按捺不住與緋聞男友林德信蜜蜜斟的松岡，翌日現身有線節目時竟沒有換衫，穿回前晚於派對上的透視黑上衣及黃色短裙，沒有回家的她莫非於男友家中宿一宵？
文、攝：追蹤組