阿叻唔使跪仲有得撈
經常力撐無綫的陳百祥（阿叻），對於前晚台慶最高收視達31點表示：「平常心，作為藝人工作已經做完，都望多人睇，今次估中（指收視高開）有運氣，亦要多謝觀眾！（有無估吓自己嗰part花式足球幾多點收視？）我無估，你估買三重彩咩，我已經估中收視，好滿意，如果太少就無得撈，依家仲有得撈，好彩。」
阿叻曾發表收視2、3點便「跪回家」之言論，如今不用跪，阿叻則揚言一直都話自己不用跪：「我一開盤就一定贏，冇無信心點做人，人哋話我囂，但其實我真人好謙虛，（驚唔驚得罪網友？）唔關我事，曹操都有知心友，關公都有對頭人，中國有成13億人，我唔得閒招呼佢哋（指網友），都多謝網友，令我引起關注！（覺唔覺得自己贏番啖氣？）冇，同賽馬一樣，一開始就有信心贏，今次係正常賽果。」
另外，陳百祥昨晨到電台接受訪問，再被問到有關「跪回家」之言論，他表示：「我係演員，你哋唔睇咪即係打爛我飯碗？我習慣做下靶，最緊要有人睇，當做宣傳囉，為公司壯烈犧牲。」