周秀娜卓韻芝女神鬥核突 數臭最惡頂男人
兩位宅男女神周秀娜 （Chrissie）與卓韻芝因拍戲成為好友，二人不怕令女神形象幻滅，自爆最核突的一面！娜姐原來跟阿芝是同道中人，不用出街即「Hea」爆，還直言意中人才有資格看到自己不修邊幅的一面。雖然二人笑言感情生活似「食齋」，但卻堅拒大聲食嘢及手指尾留指甲的兩類男生埋身，必請對方食檸檬！
匿埋屋企磨腳皮
芝 = 卓韻芝、娜 = 周秀娜、Hidy = 余曉彤、DaDa Lo = 盧頌之
芝︰大家認唔認同女人喺冇人見到嗰陣都幾核突？
娜︰實有o架啦！男人都係o架，女仔喺屋企幾樣衰，所有嘢都出晒嚟，或者係嗰啲喺屋企一個人坐梳化會坐到好衰，唔會好似依家咁樣（端正）坐，一返到屋企就會攤喺度。
芝︰我成日覺得要經歷過一啲好核突嘅嘢，磨下腳皮、「抆」下毛，做啲嘢核核突突，經歷核突先得到靚。
娜︰係呀，好似我都會「抆」下唇毛，係痛苦經歷。
芝︰咁大家做過最核突係咩？我放假嗰陣唔沖涼又唔洗頭，啲杯麵擺咗喺度3日冇郁過。
娜︰其實我都差唔多，喺屋企食完嘢唔洗，又唔會洗頭。
Hidy︰我成日聞腳板有冇味，keep住唔臭，好過臭嗰時畀人話。
娜︰吓？唔會走去聞鞋掛？
去廁所唔會閂門
芝︰但你哋怕唔怕畀另一半知自己嘅核突嘢？
DaDa Lo︰寧畀人知，莫畀人見囉。
娜︰同男朋友就OK嘅。
芝︰我覺得如果係可以喺呢個人面前核突，你可以同佢好親密，呢個係一個真愛見證。
娜︰我去toilet唔會閂門，你最核突嘅嘢佢都可以睇到，係因為唔介意畀佢睇，係一個關係肯定。
芝︰但你有冇諗過嗰個人見到你靚先鍾意你？
娜︰咪當考驗囉，咁核突都唔走，證明真係愛我。
芝︰所以應該由最核突嗰吓睇起，之後就會問點解你愈嚟愈靚嘅，又或者素顏上陣，就唔會因為你嘅外表或者化妝鍾意你。
娜︰我哋都成日見到導演（卓韻芝）素顏，證明我哋都好愛佢，佢唔介意將最核突一面畀我哋睇！哈哈！拍《爆3俏嬌娃》時佢永遠喺片場都係錯配，上身同下身唔襯。
Hidy︰其實喺片場唔會介意着得有幾怪，總之要夠暖，因為要拍好耐，拍通宵。
DaDa Lo︰係呀，導演可以突然西裝褸，但下身着運動褲囉！
齊做「爆齋俏嬌娃」
芝︰大家依家嘅感情狀況係點？我係vegetarian（素食者），食緊齋。
娜︰我同你一樣係「齋戒期」，得Hidy唔係。
芝︰咁我哋拍完呢套《爆3俏嬌娃》，可以拍多套《爆齋俏嬌娃》。
芝︰其實忙咪唔覺dry，因為呢套戲後期太忙，冇時間去悲傷，冇時間去孤獨。你要有時間靜落嚟，先有閒情逸致去諗拍拖。我享受生活，鍾意忙碌，但到最後你都想搵個人係重要過你工作。但呢啲嘢冇得強求，放假就會諗。Chrissie有冇覺得dry？
娜︰我都冇時間去諗。
芝︰有冇人約你先？
娜︰有呀，實有朋友約，女仔朋友都有o架，食餐飯好平常。
芝︰但我冇約你囉，都約你唔到嘅。
娜︰本身話約食飯，但未約到。
芝︰係我話想試間新餐廳，點知你自己去咗，有冇搞錯呀！
娜︰我幫你試食先。
芝︰不如你將我所有嘢都試咗先，之後寫個report畀我。
娜︰你指邊方面先？
芝︰（笑）梗係嗰方面啦！
最憎！男人留尾指長甲
芝︰Chrissie最憎男仔做啲咩？
娜︰我最唔鍾意男仔食嘢好大聲，jep jep聲，呢啲禮貌嚟。不過只要你鍾意嗰個人就OK。
芝︰都要好專登先會食到咁大聲喎！我就接受唔到男人留尾指指甲喇。
眾女︰吖！係啦，好核突呀。
娜︰其實我接受到男仔搽尾指甲油，但都唔好留尾指（指甲），真係唔得！
芝︰我諗我見到呢個景象，我再唔能夠同佢傾偈落去。
娜︰朋友都冇得做？
芝︰唔好喇，一係戴手套，因為我唔可以停晒去望你手指尾，集中唔到精神同你傾偈囉。
娜︰哈哈，如果要識阿芝嘅朋友，千祈唔好留尾指指甲，因為連朋友都冇得做呀。
後記：7日唔洗頭「芝」論
當討論頭髮要否每日洗的問題時，周秀娜踢爆卓韻芝曾說過7日唔洗頭都可以乾淨的偉論，令現場嘩然，其後阿芝力撐說︰「係真o架，如果你長期唔洗頭，頭皮會自行分泌一啲嘢令自己乾淨番，我有一個朋友佢讀哈佛大學住宿舍嗰陣，就有一個印度女同學成個學期都冇洗頭。」看阿芝言之鑿鑿，似乎真的試過呢！
採訪︰藍裕彤 攝影︰吳文聰
場地︰Hayabusa Martial Arts & Fitness Center
服裝︰D-mop
化妝︰（卓韻芝）Miu_M@such a good、（周秀娜）Yan Chiu（D-mop beauty by ND&Co.）
髮型︰（卓韻芝）Ziggie@salon La Mod、（周秀娜）Daniel Cheng@ChinG