(17)李大衞擦鞋 贏快閃少林拳
十八位亞洲先生昨日進行才藝表演，全程鬥Hea，睇頭欠奉卻笑位不絕！(7)王鍾以「光速」廿秒完成少林拳，(9)趙之健唱歌甩嘴講Sorry，(14)余健深講冷笑話反問點解冇人笑，最後由歌藝不俗又識擦鞋的(17)李大衞勝出。
「沒有最騎呢，只有更騎呢」！應屆十八位亞洲先生昨日齊集亞視比拼才藝，大部分都騎呢兼Hea爆，令人捧腹！北京(6)劉梓豪演戲，坐在椅上擺出愕然表情，之後突然「撻」落地，認真抽象；江蘇(7)王鍾耍少林拳，但未夠十下就收工，真係眨眼耐啲都睇唔切；廣州(9)趙之健唱歌時狂甩嘴，尷尬說了三次Sorry。
冷笑話凍絕全場
韓國(11)崔宰源在屏風後「表演」換衫，要人看着黑影呆等，之後露面Hea行幾步又換衫，睇頭欠奉，亦不見其換衫速度有多快；馬來西亞(14)余健深甩甩咳咳講了個關於餃子的笑話：「兩隻餃子結婚洞房，但剝衫後男餃子唔認得對方，女餃子就話『好衰o架！人哋冇着衫就唔認得人。』」但講完後全場鴉雀無聲，他無奈地說：「講完喇！你哋做咩唔笑？可唔可以畀啲掌聲我？對唔住，我準備唔夠。」其後突然做一字馬「補飛」。
自爆戴思聰學生
如此「精彩」，難怪評判羅霖表示亞生應加強自信，寄望他們在本月15日的決賽中脫胎換骨！(17)李大衞唱歌後擦亞視鞋，感謝大會給予機會，未知是否因而加分，冠軍亦由其奪得。事後他又自爆是歌唱老師戴思聰的學生，並說：「班上同學都讚我靚仔，幫我投票。（其他對手弱？）唔係，每個人都有自己強項。」最後，亞軍是來自日本、表演空手道的(18)大塚寬之，季軍竟有四位，貫徹亞視奇怪作風，分別是(4)鍾昊、(10)王磊、(12)李健及(13)楊志仁。此外，崔宰源贏得由參賽者互選的「最友好兄弟」獎，但不懂中文的他對獎項一無所知，還自誇表演特別。
文：影視組