梁安琪撐樂壇50萬搞比賽
梁安琪（Angel）前晚以司儀及主辦人身份出席在伊館舉行的「搖擺天使勁Band音樂節」，由十隊本地樂隊進行對壘，最後由Fear Index贏得總冠軍。Angel指今次自資50萬舉辦比賽，皆因對搖滾有情意結，提到最近有人狠批「樂壇已死」？她相當勞氣說：「我強烈譴責呢啲有破壞、冇建設嘅人，樂壇冇死到，只係音樂人少咗機會，講呢啲嘢嘅人簡直係井底之蛙。」
而太極成員鄧建明（Joey）及劉賢德（Ernest）擔任嘉賓及評判，談到好友周啟生指樂壇處於末期癌症階段，又踩陳奕迅聲線麻麻等，他們說：「咁我哋做藥囉，一齊做好啲。但佢睇嘢偏門咗，睇唔晒成個樂壇，其實仲有好多正嘢。」