林德信窮途末路 一日一餐
歌手林德信（Alex）去年挾「林子祥之子」之名勇闖樂壇。本來有樣、有老竇後台已夠屈機，不過他卻不甘做裙腳仔，誓要靠自己幹一番事業！Alex為追尋音樂理想，不惜拿着結他，走到酒吧敲門求表演機會；窮途末路之際，也只好一日食一餐頂硬上。也許你會問：「做林子祥（阿Lam）個仔要捱苦咩？」本來我不信，現在我信了。
愛音樂也要食飯，為了維持生計，Alex只好邊做瑜伽導師，邊夾band作歌尋覓理想。皇天不負有心人，2010年，在一次偶然機會，Alex因留着爸爸的「招牌鬚」，結果幸運被選中成為廣告模特兒，順利入行。
我喺美國大學畢業之後，有返過嚟香港想做音樂，不過我冇乜同爸爸講自己嘅心意，因為我想靠自己實現音樂夢！雖然我鍾意彈結他，不過爸爸只會當佢係我嘅興趣，冇叫我入行做歌手。
自薦表演食檸檬
曾經，我試過獨自拎住支結他去搵酒吧畀我做表演，不過好唔成功，因為啲觀眾唔會專心聽我唱歌，好lonely！之後搵到班朋友一齊夾band，就錄歌send畀啲唱片公司，可惜冇乜反應！而最窮試過喺美國揸車入油，我冇錢到喺車執晒啲「散紙」，叫個職員睇吓可以入到幾多油。為咗慳錢，我不惜一日食一餐，有時見到啲嘢想買都買唔到，真係好窮！當時屋企人冇畀錢我，完全靠自己，不過依家諗番，都係一個幾好嘅經驗。
有年我聖誕節返香港探屋企人，我遇到一個好好嘅入行機會。有次，我去睇陳奕迅演唱會，遇見一個相機廣告嘅導演，咁啱佢想搵一個有鬚嘅男仔，而咁啱我又留咗鬚，所以我一行過去，佢就即刻「嘩」一聲，然後叫我去試鏡，仲成功咗添。拍完廣告之後，我仲發覺呢次收入係等同我教一年正職瑜伽嘅收入。
嘆做明星惹麻煩
其實我27歲做樂壇新人都算遲，不過相對地可以有多啲時間諗清楚人生方向。
我識好多朋友18歲已經入行，但我發現佢哋從來未試過正常社交生活，反而我比佢哋做多幾年普通人。好似我上年入行，啲人啱啱識我，但慢慢發現做明星有少少麻煩，會冇咗好多私隱。有時約女性朋友出街，都要叫多幾個朋友出嚟，仲有朋友話我：「你以前都唔係咁，鍾意去邊就去邊，你依家變咗啦！」其實我唔想o架！
不避嫌讚松岡叻女
成名需要付出代價！除了冇私隱， Alex亦不時跟圈中女星扯上緋聞，對象更遍布不同地方，當中香港代表有姜麗文、台灣代表有陳妍希，而日本代表則有松岡李那！
我同姜麗文都識咗一段時間，我哋成日都會傾音樂！我覺得佢好叻，雖然佢冇學過音樂，但佢作到好多好歌。佢之前有首歌係Rap，我嘅rappers朋友都讚佢Rap得好！
冇追過陳妍希
至於陳妍希，佢係我美國嘅大學同學，記得第一次見佢，已經覺得佢好cute，會望多幾眼。讀書嗰陣，佢已經有車，仲成日車我出去食嘢。以前佢好多人追，不過我就冇追過佢，一直都係朋友關係。
而松岡呢，係朋友介紹認識，佢兩年前嚟香港，一句中文都唔識聽，但之後都學識英文，仲識講啲中文，真係幾叻。我知道香港有好多外國模特兒，都未必咁願意接觸太多香港事物，但松岡唔同，感覺到佢真係好鍾意香港！
後記：激吻雨僑 喊驚
未知Alex是否太愛做瑜伽的關係，他予人的感覺總是慢條斯理，說話陰聲細氣。當聊到他有份拍攝的電影《喜愛夜蒲3》與雨僑激吻的心情時，他即時面紅，還怕醜地說：「我好驚呀，我未拍過呢啲戲，所以我唔知呀，好緊張呀！」雖然這番話很難想像是出自滄桑Alex的口中，不過眼見他如此心如鹿撞，突然發現，他還有的，是臉上看不見的少男情懷。
口述：林德信
筆錄：文珊
攝影：沈健程
髮型：Eve Chiu＠Queen's Private I
化妝：Kirsty Lam