劉嘉玲原諒綁匪：多謝冇侵犯我！
劉嘉玲接受電視台訪問全無忌諱，暢所欲言大談當年遭綁架一事。她直認已原諒了四位綁匪，更要多謝他們。她坦言事無不可對人言，惟一令她最痛心的，是事件一度讓父母相當擔心。說到激動處，素來「硬淨」的嘉玲亦不禁眼泛淚光，場面感人。
嘉玲早前答允黎芷珊邀請，接受無綫清談節目《最佳女主角》訪問。據悉，嘉玲將以壓軸嘉賓身份登場，訪問內容將分成約四集播出，而她於節目內的剖白遭「洩密」。
冇禁忌唔講得
嘉玲重提被綁架似乎往事如煙，且豪氣表示早已原諒了四位匪徒：「反而要多謝佢哋，因為佢哋冇侵犯我。」昨午嘉玲出席關注婦科癌症的慈善活動時，亦向記者承認謂：「係呀，徹底放下嘞！依家我做訪問冇乜禁忌唔講得，呢啲嘢最緊要過到自己嗰關。（有冇爆小秘密畀芷珊知？）都有，但唔記得咗嘞，因為我冇乜秘密。（點解講到眼濕濕？）到時睇咪知囉。」
據知，當年嘉玲獲老公梁朝偉與一眾好友支持，可以堅強面對逆境。她之所以眼泛淚光，原來與雙親有關：「我返咗屋企，父母一句嘢都冇問過，媽媽淨係煮飯掃地，佢哋係唔想畀壓力我，見到佢哋咁我仲難受！」自從劉爸爸過身後，劉媽媽獨自在上海生活，對女兒提供的物質不感興趣，依然慳家。嘉玲說：「我請司機畀佢佢唔用，叫佢搭的士又話冇需要。當然佢為我嘅成績感到驕傲，但最希望嘅，始終係我擁有快樂健康嘅人生。」對於有傳嘉玲躋身內地富豪榜，她笑稱：「呢啲報道嘩眾取寵，唔好信，得啖笑，我都係勞動人民咋！」
黎芷珊讚堅強
黎芷珊則大讚嘉玲是堅強女子：「佢外表好靚但內在唔軟弱，係一個好堅強、好豪氣嘅女人，勇敢重提往事可以帶到正面信息畀大家。（嘉玲感觸而喊？）係，我都受到感染而眼濕濕。（對佢往事好震撼？）係呀，絕對可以出書。」芷珊坦言主動向嘉玲問及被綁一事，對方認為事無不可對人言，故整個訪問時間足足三個多小時。
另外，劉曉慶是黎芷珊第一位嘉賓，節目內提及她當年逃稅入獄一事。劉曉慶表示當時只知道自己不會被槍斃，獄中的她每天以冷水洗澡，且跑了八千多步，視之為一種鍛煉。
文：影視組