蔡卓妍有血有肉學慢活
杜汶澤與蔡卓妍（阿Sa）在英皇新片《超級經理人》中合作，現實中二人亦同屬經理人霍汶希（Mani）旗下，演出時更加得心應手。阿Sa憶述多年來與Mani合作，印象最深一次「拆彈」經驗是與前夫鄭中基結伴舉行離婚記者會一事。而阿澤亦坦言與Mani有過意見不合的日子。
蔡：蔡卓妍
杜：杜汶澤
蔡：杜汶澤，你知唔知我以前好憎你。
杜：我知，有次我同鄭中基去飲酒，你不停打電話嚟，我就搶咗個電話講粗口鬧你嘛。
蔡：以前我覺得你把口真係衰到爆，點解有個人會每分每秒都會得罪人？不過我原諒咗你，因為我感覺到你信佛之後戒咗好多嘢，仲識得轉變方式去講嘢，依家我變得好崇拜你，你可以好坦誠面對自己、其他人和社會。我當你係香港英雄o架，依家好少可以咁真誠嘅人。
杜：我簽咗英皇後同你同一公司乜事都冇啦，今次仲合作埋《超級經理人》。其實你同經理人Mani合作咁多年，有邊件事令你最深刻？
蔡：都算係離婚嗰次個記者會。出面好多公司經理人為咗保護自己藝人，做事手法可能會攻擊到人哋或互相攻擊，但我唔想件事變咗好似嗌交咁。嗰次Mani處理得好好，令我感到好舒服。大家咬緊牙關去面對。如果再製造更多事出嚟，只會令suffer嘅日子愈長。你呢？覺得Mani點？
溝通建立友誼
杜：我同Mani都有衝突過o架。我覺得合作貴乎坦誠，唔好將個人感受隱瞞。有次佢要我上內地一個好受歡迎嘅節目，但我唔想去，意見有啲不合。我明佢係我經理人又叫得我郁，見到佢用咁多方法搵到呢個機會畀我上去，我諗如果我唔肯上，佢又好淒涼。有時都為咗呢啲嘢去拎出嚟講，咁有咗溝通就會建立到友誼。
蔡：其實點解我又會同你做到朋友嘅？
杜：你思想都好成熟，但點解啲人成日覺得我大你好多？可能你好細個入行，經驗豐富。其實我同你差唔多大，只不過你每日工作廿四小時，我就幾年拍一部戲。你入行日子雖然比我遲，但工作頻率、經驗高過我啦。我欣賞你EQ高，可以用好柔軟嘅方式去睇每一件事，你口頭禪係「是但啦」，證明可以明白到呢行有啲嘢冇得執着和堅持，所以咪惟有「是但」面對。
尊重不是怕老婆
蔡：我同你都有個同樣喜好，就係食嘢，所以大家多咗好多話題。其實你有乜死穴，一講就會唔高興？
杜：我又冇乜喎，點解會有嘢連自己都接受唔到？咁點接受到呢一行工作呀！
蔡：我都係嗰句「是但啦」。最重要自己點睇自己，最緊要自己要開心。別人點睇你、開唔開心，我係控制唔到。好似呢排我鍾意做健身，係為咗健康。人開始大嘞之前工作積落，我要練好啲條腰，之前跳水整親，條腰本身好弱冇乜肌肉呀。
杜：因為你有人生第二個目標？
蔡：係呀。我依家要放慢身邊所有嘢。我發覺早幾年實在太忙，有段記憶冇咗，直頭唔知自己去咗邊。我享受唔到工作過程，久而久之冇咗感覺同生活，日日只係開工，連生活嘅味道都taste唔到。外國有一種生活叫「慢活」，我想去學，與其日日行屍走肉，我想有血有肉咁過每一日。我好慶幸自己十幾年努力工作，總算有啲積蓄，事業上又喺一個幾好嘅位置，所以有得選擇去做呢件事。你呢？啲人話你怕老婆喎。
驚下半世孤苦
杜：我唔係怕，係非常怕！呢個係一個尊重，當你知道若果做咗啲咩事會失去另一半，咁自己之後點過呀？好淒涼啫，諗到呢度就好可怕嘞。所以我要好珍惜同愛護對方。怕，係怕失去，你要好好去愛護同保護佢囉，呢個係我目標。
蔡：你老婆田蕊妮好崇拜你o架，但你都對老婆好好o架。我試過問阿田，點解你老公咁衰都可以同佢咁多年？佢就話：「佢對我好時你哋見唔到啫。」幾鬼sweet呀！
杜：你係咁爆我嘢，我覺得好瘀皮喎！我同太太1999年認識，佢十幾歲識我，我梗係自細洗佢腦，等佢以為我好叻啦。搞到佢以為我好勁，咪崇拜我囉。
後記：網上搶平機票
蔡卓妍在杜汶澤心中除了心地善良的小女孩外，其實亦是「慳妹」一名。杜汶澤踢爆阿Sa鮮為人知的一面，指她貴為當時得令的藝人，出埠搭飛機經常都棄坐頭等或商務，只會低調坐經濟艙，阿Sa直認不諱說：「係o架，我成日上網買平機票和酒店，啲旅行Package好啱我，價錢最相宜，不過要手快有手慢冇，因為好多人會搶平機票o架。其實去東南亞地區旅行，坐幾個鐘頭飛機，我唔覺得經濟艙有乜問題，旅行最緊要開心。好多時都係同一班朋友去，圍內都係自己人。」
文：影視組
化妝：小鬼、Circle Cheung （Dmop beauty by ND & Co.）
髮型：Tim @ Queen Private-i、Mike Chau （HH hair.nail by iL colpo）
場地：The Central Wine Club