娜姐JC齊插DaDa唔專業

DaDa自今年4月奪得《金像獎》「最佳女配角」後人氣急彈，片約紛至，亦已簽約接拍新片《喜愛夜蒲3》，可是自前晚發出「退出」宣言後，形同消失空氣之中，除昨日再於微博留言外，即使經理人施念慈及《喜3》劇組人員起勢尋人，DaDa繼續潛水懶理。其死敵周秀娜和Jessica C.不約而同寸DaDa有欠專業。

娜姐句句有骨落地說：「我覺得佢嘅決定，係想喺高峰期光榮退落嚟囉！其實聽到話佢退出幕前好突然，啱啱先有啲成績，咁就唔玩？唔係嘛？」對於有指連劇組人員也聯絡不上DaDa，她寸爆說：「真係有啲唔專業，如果真係搵佢唔到，我建議錢國偉可以將佢第一集嘅片頭片尾剪落嚟頂住先！」十分抵死。

DaDa在微博自稱因情緒病萌生退出念頭，而娜姐亦曾被指患上抑鬱症，對此娜姐說：「大家情況唔同，佢咁小事，有得醫！其實做幕前個個都大壓力，要有好嘅心理質素先可以捱落去！」

與Jeana結伴暢泳

Jessica C.亦暗寸DaDa，指對方應完成手頭上的工作才引退：「佢做呢個決定要三思，因為青春有限，佢又攞埋最佳女配角，應該要珍惜機會囉！其實工作壓力咁大，我都有諗過放棄，最終我都捱過啦，希望佢都得！」

未入行前已跟DaDa老友鬼鬼的何佩瑜（Jeana），原來一直有跟DaDa聯絡，日前更結伴暢泳，她說：「佢話會養好身體，叫我唔需要擔心！其實之前我都唔知佢有情緒問題，佢掩飾得好好！作為朋友都希望佢可以考慮清楚，行一條開心嘅路！」

文：專案組