王大業5年後娶莊思敏
王大業（Andy）貴為皮草太子爺，而莊思敏（Jacquelin）則是城中名模，二人自小已是時裝狂熱分子，對時裝有着獨特見解，今次是兩人自緋聞傳出後首次孖住接受本報訪問，暢談時裝經，分享個人穿衣品味與風格！
A：王大業
J：莊思敏
穿衣品味
品味未必人人有，卻可以培養出來，究竟二人如何看待時裝？
A：時裝令生活更加精彩，因為時裝本身就有趣味性。
J：時裝對我嚟講係必需品，但要有要求，品味可以從小培養，唔識打扮咪睇時尚雜誌或留意身邊人。
算是時裝狂熱分子嗎？
A：唔敢話自己係，只可以話我一得閒會上網睇時裝，發掘唔同時裝網址，留意唔同國家嘅時裝文化同新進設計師。其實，我每個月見到自己張信用卡就驚……。
J：以前會狂熱啲，不停買衫，依家就唔會花好多錢買衫，因為真係冇地方擺。
二人又怎樣看自己的穿衣品味？
A：我勇於嘗試不同類型服飾，冇特定風格，唔會被定形，我講求時裝係好玩，好怕悶！
J：尚算合格，唔覺得自己好有個人風格，因為我衰懶，唔鍾意襯衫。
欣賞曼玉王菲品味
Andy與Jacquelin對時裝潮流各具見解，品味也不同，但一講到香港時裝潮流，卻忽然變得很合拍，坦言香港雖然不乏時裝達人與時尚人，整體來說卻偏保守，商業味較重。
A：香港時裝唔夠創新大膽，我要時裝有趣味性，唔單止得個「型」字，好似日本品牌Phenomenon，由Takeshi Osumi創立，特色係以街頭音樂混合各種流行派的文化元素，可惜早前宣布破產，佢玩嘢玩到好似燒銀紙，冇顧及市場需要。
J：香港人好鍾意笑人，係咪都笑人一餐，唔識以欣賞角度出發。要令香港時裝文化提升，就要將香港人嘅時裝心理質素提高。
最欣賞時裝設計師？
A：Juun J.同Thom Browne，但講到最愛都係Raf Simons，佢簡直係我心目中嘅神級設計師，我記得喺96年買佢第一件衫，其實佢先係第一個設計slim cut男裝，比Hedi Slimane還要早；而日本品牌Visvim嘅民族feel夠獨特。
J：較為欣賞時裝潮人Joey Ma，連時裝博客Diane Pernet都曾點名力讚，佢着衫誇得有型，又愛女服男穿，以前都會好欣賞Alexander McQueen同MMM，但依家變得商業味重。
最想與哪個品牌或設計師合作？
A：我好貪心，個個都想合作，因為每個設計師都有唔同風格，有值得學習地方，如果真係要揀，就揀Comme des Garcons，好欣賞佢嘅解構主義。
J：我較鍾意太陽眼鏡，同服裝一樣都係必需品，夜晚戴太陽眼鏡出街唔好話人係怪物，係時尚一種，韓國已成為一種潮流，太陽眼鏡有好大發展空間，希望可以同Linda Farrow及Alain Mikli合作參與設計。
有否fashion icon？
A：冇，因為每個人都有自己風格，如果要講，我諗到係Wyman。
J：Victoria Beckham，佢着衫唔係大膽，但每次出街都會執到靚靚，由頭到腳都好講究，連甫士都有特定姿勢，係另一種時尚態度。仲有張曼玉同王菲，都有自我一套穿衣模式，不經意打扮都展露出個人風格，每次出現都會成焦點，被談論衣着品味。
富二代之戀
潮流以外，少不免提及二人的緋聞吧！王大業與莊思敏這對緋聞情侶來自富裕之家，男方是皮草大王長子，女方則是馬來西亞拿督莊寶的長女，無論家底與朋友圈子，都是天造地設的一對，兩人亦因一次飯敍而傳出緋聞，但他們只當作娛樂新聞一則，笑言純友誼關係純過蒸餾水。擦不出愛火花，究竟二人之間欠缺些甚麼？
A：我相信第一眼感覺，係就係、唔係就唔係，加上我哋各有各忙，一年見得幾次，想追都追唔到。
J：點解我哋要成為情侶？一切要講緣分，我哋之間有緣做朋友、無分做情侶。食餐飯唔代表乜嘢，通常我唔會一個人食飯，如果影到我自己一個食飯就係反常。
那麼與富二代拍拖可有壓力與難忍之處？
A：富二代同富二代拍拖最冇壓力，因為家庭背景、教育同朋友圈子都差唔多，溝通上比較容易。但唔代表富二代同普通人拍拖就有壓力，在乎自己點睇！富二代都係普通人，唔好講到我哋脾氣差，唔通普通人就冇脾氣咩？
J：係咪門當戶對都會有壓力，始終我係公眾人物，就算同普通朋友出街都會畀人講。每個人都有脾氣，好正常，唔覺得富二代就代表脾氣差同難忍，咁講好唔公平。
分手原因次次一樣
王大業最為人所知的一段情是跟賭王何鴻燊與三房陳婉珍所生的長女何超雲，有指分手主因是難忍雙方的「公主病」與「公子病」；而莊思敏與吳浩康結束五年情後，林忠豪曾展開追求，卻不為伊人接受。人人對愛情追求都不同，由熱戀到分手都有着不同的體會與反思，分手原因又是甚麼？
A：我每次拍拖都唔耐，可能開始太快，未了解清楚，最終係因了解而分開。雖然每次分手主因都係一樣，但次次都犯同樣嘅錯，人就係犯賤！
J：每次分手原因得一個，就係見唔到將來，當發現大家步伐唔再一致，自己一廂情願繼續行落去，雙方都會感到吃力同辛苦，倒不如放大家一條生路。
二人做不成戀人，可說是知己嗎？
A：我哋只係識咗年幾兩年，我覺得佢好爽直同好啱傾，無論發生乜事，我都唔想失去呢位朋友，因為現在好難遇到知心朋友！
J：一男一女唔代表一定拍拖，我同佢絕對係純友誼關係！佢係一個上進青年，好投入同認真工作！
擇偶條件又是甚麼？
A：最重要係眼緣同溝通得到，溝通唔到，靚一靚都冇用，簡單嚟講，依家我着重內在美多過外在美，外在美我只會當做bonus。
J：明白我同願意為我付出，最重要有上進心。
訪問期間二人不時互窒對方，令現場滿載歡笑聲，問Jacquelin會否很難找到另一半時，她笑說：「係難……但唔代表冇機會！」她更誓言要五年內嫁得出：「我唔會攝灶罅！」言畢，在旁的Andy隨即哈哈大笑，指她五年內都冇人要，Jacquelin即提出抗議，最終Andy屈服，更戲言：「如果佢五年內都冇人要，我唯有『啃』咗佢！」愛情路上沒有對與錯，只是時間上出錯，未能在合適時間遇到合適的人。
發掘潮流資訊
潮流每季不同，兩人是從哪裏取得資訊？
A：以前互聯網未咁發達，就會睇時裝雜誌，依家就多上網，好似www.style.com、www.hypebeast.com、www.ssense.com同日本網www.honeyee.com等，其實我偏向日本同比利時設計師，當年比利時六子出道時我就鍾意，你哋可以話我較為另類。
J：雜誌同網絡世界都係最主要來源，我亦好留意身邊嘅人，就算時裝店櫥窗都可以吸收到潮流資訊，知道當季hot item。
採訪：劉慰思
攝影：秦健輝
場地：Beijing Club（中環）