梁漢文吳國敬 鬥氣沙煲兄弟
吳國敬在最後一期「二口同聲」請來壓軸嘉賓梁漢文（Edmond）暢談逸事，兩個波牛由細踢波踢到大，更齊齊入行發展歌唱事業，齊上齊落的背後，原來兩兄弟私下經常鬥生鬥死，即將夥拍鄧建明（Joey Tang）開騷的阿敬更公然向Edmond下戰書：「我要撼贏BIG FOUR！」
吳：吳國敬 梁：梁漢文
互相揭怪癖
梁：喂，覺唔覺頭先影相時，我哋啲眼神好gay？
吳：我哋由小學開始識，跟住一齊踢波大，仲一齊入行，識咗咁多年，你知我眼神係咁o架。
梁：嗰陣成日喺沙田踢石屎場，之後仲一齊踢五人比賽添。
吳：你就勁啦！踢青年軍，我嗰陣畀人叫我「虧佬敬」添呀，又瘦又奀挑鬼命，真係孱到離晒譜。
梁：咁我成日游水，又玩運動，體能係好啲嘅，你成日死都唔願郁。
吳：係嘅係嘅，不過除咗合作踢波，我哋音樂上都有好多合作o架！
搣耳上癮
梁：但係唔明點解次次你錄demo，都硬係要「Di Ga Day Di Ga Day」咁唱，明明叫咗你改唱「La La La」又唔肯，咁多年都唔變嘅。
吳：我係咁o架啦，你咪又係改唔到搣耳仔嘅習慣，你簡直係搣到上癮，但我好佩服你可以搣得咁出神入化，可以「啪啪」聲o架喎！我私底下試過搣，都搣唔出聲，你真係勁！係咪好feel過撩鼻屎呢？
梁：哈哈哈……我哋兩兄弟大家都有古怪習慣，但大家都會接受，所以先叫你寫首《Di Ga Day》畀我，話時話，我早幾日喺微博貼咗段文畀你，係有個fans讚呢首歌。
吳：有咩？唔見嘅？
梁：你係咪有老花呀？睇清楚啲啦！
吳：你又知我有老花嘅？依家真係名副其實老花band友喇！
敬嫂走唔甩
梁：點止，你仲要係一個又懶又「呢啡」嘅老花band友，搞到我哋BIG FOUR四個成日都要鞭策你，不過講到尾，你女友Elaine真係唔嘢少，你咁多個女朋友當中佢最治到你，佢話一，你唔敢話二，你哋究竟幾時結婚呀？
吳：計劃緊o架啦，邊走得甩吖，如果唔娶佢，真係命都冇呀。
梁：你真係好肉麻，不過都祝福你哋！但係唔好有老婆就唔理兄弟。
吳：咁多年兄弟情，點會郁啲就散吖，之前啲報道夠話因為BIG FOUR飛起我，搞到大家反晒面，真係得啖笑，根本冇呢回事。不過嚟緊我同Joey組band開騷，要撼贏BIG FOUR就真嘅，哈哈！
吸收靈感
梁：好吖，有鬥志係好事，等我準備定啲嘢，到時踩場整鬼你。
吳：放馬過嚟！不過，講搞笑同搞氣氛，真係唔及得你哋四個。
梁：唔好咁講，橫掂我哋去歐洲做騷，一齊交流吓，吸收吓靈感囉，對上一次我哋五個人一齊去玩係幾時嘅事？好似係去東南亞做騷。
吳：我最想去Beatles影海報嗰條Abbey Road影相，我哋五個披住長髮過馬路，諗起都覺得型。
梁：不過真係要讚一讚你嘅工作態度，一切都工作至上，叫你早啲過歐洲一齊睇歐聯，你死都話要做埋手頭上啲嘢先飛得，真係好欣賞你。
隨時互片
吳：合作咗咁多年，大家都慣o架啦，如果同外人合作，佢哋都未必頂得順我哋。
梁：係呀！好記得有次大家開會，我哋幾條友互拋意見嘅同時，亦會兜口兜面勁插對方，因為大家太熟啦，所以可以毫不留情互片，呢啲簡直係我哋嘅風格，仲記得嚇到在場嘅人呆晒，佢哋個樣真係超好笑。
吳：講開互片，你同阿公（蘇永康）嘅話人方法都好唔同，每次我有煩惱嘅時候，你都會用暗示嘅方法引導我，等我可以思考多啲。相反阿公就唔同喇，佢會大大聲指住我話：「x敬！你咁樣唔得o架！你應該咁咁咁……」但真係好多謝有你哋四位兄弟照顧我咁多。
「雷氣」的故事
拍攝當日，老友鬼鬼的Edmond同阿敬一見面就雞啄唔斷，影相時更不時整蠱對方，可見兩人「情比金堅」！講到難忘事，Edmond指阿敬份人雖然「呢啡」，但相當夠「雷氣」，他說：「好多年前我啱啱學作曲，買好晒啲儀器，但開唔到機。當時係凌晨3點，我一個電話，佢就由西沙飛過嚟九龍塘幫我，真係唔話得。」在旁的阿敬挖苦說：「其實佢係撳少咗粒掣所以先開唔到機，真係吖！」
文：音樂組