法拉唔做少奶寧願踢拖開工
陳法拉、陳豪和黎耀祥等前晚夾錢請演出劇集的台前幕後食飯，難得高層曾勵珍撐場，演員個個圍住傾偈，陳豪、祥仔當時得令，當然得珍姐歡心，亦不及法拉賣口乖讚無綫供演員足夠時間休息，令她拍劇冇壓力，故她連少奶都唔願做，寧願開工！
由陳法拉、陳豪、黎耀祥和伍詠薇等演出的無綫新劇《傳愛事務所》日前煞科，主要演員前晚夾錢擺六、七圍請食飯，而罕有出席飯局的曾勵珍亦有撐場。期間法拉、陳豪圍住傾偈，法拉更大賣口乖，讚無綫有改善，供演員有充足時間休息，她說：「我拍完《傳》又為《衝上雲霄2》宣傳，（唔使過吓少奶生活？）依家拍劇冇咁大壓力，平日開工可以踢拖，但做活動着衫又要左襯右襯又要諗扮靚，其實仲大壓力，而且拍《傳》都唔算辛苦，公司福利改善好多，我都有時間休息，試過農曆新年放三日假添！」
黎耀祥谷胸肌
至於同場的祥仔，拍完《傳》後便即為《巾幗梟雄之義海豪情》開工，由於劇中有多場騷肌戲，祥仔最近忙着Keep fit，為要令觀眾有爆肌感，他稱晚晚做掌上壓谷胸肌：「都做6、70下o架！除咗騷肌要露兩點外，仲有激咀戲，不過電視尺度有限，我都唔想用激情戲嚟賣弄，搞到觀眾冇集中睇劇情！」
文：影視組