陳展鵬寧贏口碑唔恨視帝

近日無綫劇集愛以強姦、露肉搶收視，《雷霆掃毒》和《法網狙擊》等均破30點，播放中的《心路GPS》成績則未如理想，最低收視更達23點，男主角陳展鵬卻未被打沉，他力撐該劇有深度「開心或爆炸呢啲咩人都鍾意睇，因為有娛樂價值，但我哋有反思、反映社會問題。雖然成績係重要，但口碑先最緊要，作為演員都希望拍有深度嘅嘢。（觀眾胃口養大咗？）其實都需要，但公司咁多套劇唔可能套套都咁，好多人成日批評我哋冇教育意思嘅嘢，我哋都要迎合所有觀眾口味。香港觀眾好慢熱，尤其習慣咗嘅嘢要改唔係咁易，但唔好話大眾唔認同嘅嘢就縮，不斷表達實Okay。」

想拍科幻劇

展鵬表示愛試新鮮事，除希望透過劇集帶出些訊息外，更想拍超越時空題材的劇集，例如殭屍片，「依家拍劇冇咗好似《倩女幽魂》嗰種意境，太寫實，我覺得可以拍番呢類有空間幻想、超現實嘅，希望自己可以參與到。（想拍涉及政治話題？）政治嘅我都想，但要睇題材得唔得，其實我已有兩、三個劇本在手。（轉做幕後？）我鍾意o架，但太遠唔諗住啦，依家做演員仲有好多嘢要學習同嘗試。」

創意最重要

由亞視過檔無綫的展鵬，直言現在較以前空間更大，「因為大公司資源好，有好多觀眾會睇，返嚟好多feedback，知道自己有咩可以進步同缺點。（想爭視帝？）我冇諗呢啲嘢、亦唔渴望，以前做運動員都冇諗住攞冠軍，當做好本分、裝備好自己，自然就會有冠軍，即使輸都心甘命抵，贏咗係個光榮。（攞獎唔係目標？）我目標唔係呢度，當你係個creative嘅人就唔係睇個獎，好似徐克、許鞍華都唔係諗住攞獎而拍戲，我諗住拍戲去反映、表達一啲嘢，獎畀到我咪要囉。」

文：影視組