Super Girls篤爆歌迷送驚喜
女子組合Super Girls出道一年多，日前才舉行處女簽名會，等到歌迷頸都長！為氹偶像開心，fans出盡法寶製造驚喜，豈料五女早已「洞悉先機」，不過她們亦「禮尚往來」，苦練簽名回報歌迷！
日前女團Super Girls舉行首個簽名會，吸引200多名fans一早到場排隊，隊長Aka的媽媽和妹妹更帶同鮮花排頭位，成了「頭號粉絲」，獲家人撐場的Aka感動得眼濕濕。fans又為每位成員送上自製花牌，不過原來Aka和Jessica早已悉破歌迷的驚喜，Aka說：「早幾日媽咪同我講，話凌晨喺公園撞見我哋啲fans喺到整緊禮物！」Jessica補充說：「我上網都見到fans整禮物啲相，我知佢哋做咗幾晚通宵好辛苦！」
罰抄練簽名
Aka又表示簽名會前一晚緊張到失眠：「因為之前我哋唔可以幫佢哋簽碟，特登等到今日第一個簽名會先簽！」Heidi則說：「唔止我哋，我上網見到有fans話佢哋都緊張到瞓唔着！」一向大頭蝦的Yanny更笑言：「之前有幫佢哋簽過File，但係我好烏龍，成日簽咗銀行個名落去。」有見及此，Cheronna前一晚進行「特訓」：「我拎咗練習簿，罰抄咁練簽名，仲叫媽咪教我點樣簽得靚啲，因為我本身寫字都唔係太靚，哈哈！」
Heidi拍床戲
最近Heidi「單飛」進軍大銀幕，要飾演壞女孩，她說：「好開心有咁嘅機會，不過都幾大壓力，因為套戲入面我好反叛，會食煙吸毒講粗口，但係我唔識呀，好乖o架我！」她卻遭Jessica爆料：「佢一知道要拍呢場戲就大叫『死啦我唔知點食呀』，所以我哋就幫佢搵啲少啲尼古丁嘅煙，佢仲講笑話驚自己會上癮。」Heidi笑言吸一支即見暈，她預告稍後要拍床上戲，性感演出！
文：音樂組