葉德嫻再戰紅館主權在手
力求完美的葉德嫻本月在紅館開演唱會，原來她也苦等這個機會八年，不過卻預告可能是最後一次的演出！而她今次被打動開騷，因為主辦商讓她有話事權。
相隔八年，葉德嫻（Deanie）本月八日起，再次在紅館舉行一連三場的《Deanie Sing for me 2013葉德嫻演唱會》，她表示今次可能就是告別演唱會：「其實每次開騷我都視為最後一次，因為你唔知仲有冇能力、有冇命去做！呢幾年一直有人搵我開演唱會，一律拒絕，我唔係高檔同有錢，但我就係唔會做。」Deanie坦言今次打動到她的原因是話事權：「我講明舞台要簡潔，唔請大明星做嘉賓，音響要好，一定要有弦樂。互相尊重好難得，冇幾多主辦單位會肯咁樣，所以我做，亦都相信以後好難再有咁嘅機會！」她亦明言有考慮過封咪：「但唔係退休，總之唱到力有不逮嘅時候就要走。」
與羅大佑恩怨未消
Deanie稱今次特別挑選了一些滄海遺珠的好歌，例如《夜潮》和《白信封》，當然亦少不了經典歌曲《赤子》。《赤子》令Deanie和羅大佑友情不再，Deanie坦言已和他形同陌路：「我冇嬲佢，但畀我認識到一個商人，咁樣去做一樣嘢。把聲係屬於我，未經我同意就出咗街！」她又指羅大佑從未向她道歉：「冇解釋、冇搵過我，佢達到佢目的都唔需要同你做朋友啦！係有一次佢多咗張鋼琴家演奏會飛，問我要唔要，成個演奏會我哋只係講個鋼琴家，冇提過件事，你話係咪怪！」
讚G.E.M.唱得之人
面對每況愈下的樂壇，Deanie謙稱自己沒資格培育新人：「見到唱得好嘅咪叫佢哋畀啲心機，最多指點一兩句。我有聲，但係教人仲需要一個方法，不過我可以話畀你聽去邊度搵好老師。」她又點名讚G.E.M.是唱得之人：「佢唱得唔錯，暫時只係留意到佢。我唔知佢有冇資格成為巨星，要講天時地利人和，依家唔只要識唱歌，仲要有好嘅人際關係同宣傳先立足到。」
文：音樂組