霆鋒謝賢約熟女開餐
有意進軍飲食界的謝霆鋒，最近頻頻約開餐館的老友車婉婉取經。霆鋒無懼緋聞，日前繼續約女方到大坑歎日本菜傾公事。至於謝賢似與兒子霆鋒心有靈犀，昨日亦與「熟」朋友上山詩鈉到銅鑼灣買大閘蟹，老友鬼鬼的二人更互相攬腰揀蟹，準備一齊擦餐勁。
霆鋒自與張栢芝正式離婚後，隨即惹來不少緋聞。已是製作公司CEO的他，最近有意進軍飲食界，早前拍得他到好友車婉婉位於灣仔的中菜館取經，由於兩人近期頻頻見面傾合作大計，因此傳出緋聞。
打扮斯文
向來我行我素的霆鋒無懼緋聞，繼續相約好友婉婉到港島大坑高級日本餐廳晚膳兼傾公事，同行還有霆鋒助手表哥及一男友人。過往喜歡以牛記笠記上陣的他打扮斯文，當晚竟穿上恤衫西褲，更gel頭赴會。當晚上11時許，食飽飽的霆鋒先行步出，甫出門口便耷低頭篤電話，然後自行登上其七人車，未幾見婉婉在男友人陪同下尾隨，之後亦登上霆鋒座駕一同離開。
攬腰揀蟹
另外，自從與CoCo分手後的謝賢（四哥）一直未有新歡，昨日被拍得與好友上山詩鈉到銅鑼灣鬧市買大閘蟹，兩人身邊還有一名小女孩。期間有不少女途人認出四哥，上前要求合照，四哥當然來者不拒。影完合照，他與上山繼續專心揀蟹，期間還互相攬腰邊揀邊傾，相當老友。其後兩人各自拿着一袋大閘蟹，更分別拖住小女孩手仔離開。
文、攝：追蹤組