吳綺莉鄧梓峰 無厘頭車震

向來形象正派、多演專業人士的「好好先生」鄧梓峰，與剛播畢的無綫劇《雷霆掃毒》中飾演他下屬的毒品調查科總督察吳綺莉，昨日無辜成為網絡瘋傳的一則傳聞主角。傳聞起初流傳於紀律部隊網站，指一部警隊衝鋒車深夜於新界八鄉七星崗，發現一部七人車，警員上前以電筒照射車廂，「發現某三色台掃毒男女藝員在車上……，當用電筒一照……並向在場警員求情不要公開」，留言者表示：「有冇人收到風係邊兩個藝員？」此傳聞前晚十一時起瘋傳，一小時後，網上更有人言之鑿鑿，將兩當事人開名，直指為鄧梓峰及吳綺莉。

有證據就攞出嚟

吳綺莉昨早返電台做節目時，對事件早有所聞，見到大批記者毫不愕然，她說：「我知你哋等乜，傳警察『照田雞』，照到我同鄧梓峰嘛！事實係冇！唔知點解咁傳，幾好笑，我同佢都唔熟，拍劇至識，我連八鄉喺邊都唔知。（有同過車？）試過同廠，冇同過車，我諗我被人整蠱同惡搞。（搵梓峰研究？）唔使，唔熟，冇電話，搵佢要經監製，愈搞愈多人，而且同事話佢唔喺香港。（點同個女交代？）根本冇咁事，唔使交代、唔使理。」

唔好以為我淨係識笑，嬲起上嚟我自己都驚。（設計對白）

吳綺莉駕駛其七人車返回大埔寓所。

身在英國為《衝上雲霄Ⅱ》拍外景的梓峰接受長途電話訪問，直斥傳聞離譜：「好激氣！完全無中生有，我同吳綺莉根本唔熟，由day 1開始都只係工作上接觸，傳都傳個熟啲，有電話、有傾偈o架！大家都有細路、有家庭，傳到咁核突，有證據就攞出嚟，警察查車會mark低車牌、時間，有冇吖？擺明作嘢！（太太點睇？）佢清楚我為人，信我。（擔心形象受損？）網絡世界任佢噏，不過我唔擔心，形象靠一路累積，呢次搞啲咁嘢，真係好激氣，仲嬲過當年話我介入溫兆倫同郭羨妮分手。」怒不可遏的梓峰昨晚更以短訊表明，若找到傳聞的始作俑者，必以法律追究。昨晚接近十一時，鄧梓峰再度在微博嚴正聲明，指有關涉及他和另一女藝人在車上發生不檢行為的短訊，內容失實，「本人僅此表明任何人士透過任何媒體傳播有關上述不實及誹謗性的報道，均需負上法律責任。」

鄧梓峰昨先上傳一張造型照，晚上則發一則嚴正聲明。	七星崗於元朗八鄉，位置偏僻，入夜後更是少見人影。（資料圖片）	吳綺莉和鄧梓峰雖曾合作拍劇，不過二人均聲稱並不熟落。

氣定神閒大聲笑

然而傳聞愈傳愈冇譜，昨日傍晚演變成「吳綺莉已被警方拘捕」。實情吳綺莉昨午一時離開電台後，到了沙田做運動個半鐘，之後返大埔寓所，全程氣定神閒，傍晚時分更不時從屋內傳出笑聲，她昨晚在電話訪問說：「好離譜，十分鐘前有人拍門，問我係咪被捕？我起初當傳言係笑料，依家搞到咁大件事，我好似有啲掉以輕心，電視台、報章、雜誌都搵我回應，警方冇聯絡過我，如果我畀人拉咗點聽電話？我冇嬲，只係覺得唔好意思，搞到傳媒朋友。（嚇親囡囡？）冇！」

無綫製作資源部總監樂易玲對事件表示：「我唔相信呢個傳聞，根本冇可能發生，兩個當事人都各有家庭。」本報昨就此事向警察公共關係科查詢，有關方面亦指並無此案，故事件可謂純屬惡作劇。

文：影視組