陳爽情迷型男「霄」遙自在

陳爽去年轉行在航空公司工作，不過從未與娛樂圈分開，最近她有參演無綫新劇。雖然要正職及拍劇兩邊走，不過陳爽表示冇難度，更高呼：「拍劇等於返工！」並笑言很開心可與兩位型男張智霖及吳鎮宇合作。

國際中華小姐季軍陳爽自去年由藝人轉行在航空公司擔任銷售經理後，她仿似跳出娛樂圈，不過她現時的工作亦跟藝人息息相關。她說：「依家我做緊sales嗰邊，有時啲藝人想搭飛機都可以搵我哋去贊助。有一次賈曉晨趕住去杭州，因為佢就嚟搭唔到飛機，所以都有打畀我搵我幫手，好彩最終佢都趕得切上機。」

最近陳爽有份參演無綫新劇《衝上雲霄2》，過程中最令陳爽感到興奮，莫過於可跟型男張智霖和吳鎮宇合作，她對兩位型男讚不絕口：「我都幾鍾意張智霖同吳鎮宇呢兩種唔同性格，因為一方面鍾意啲Sweet嘅男仔，另一方面又鍾意啲Cool Cool哋嘅男仔，令人有種距離感。」陳爽更笑言每次見到兩人都暈晒大浪。

問到會否因拍劇而分身不暇？陳爽笑言絕無此煩惱：「好有信心可以兼顧到，因為呢套劇係香港航空贊助TVB，咁我就雙重身份，代表航空公司去做一個角色，希望一邊拍劇一邊宣傳我哋航空公司。所以我拍劇係唔使攞假，喺TVB返工就好似喺航空公司返工一樣。」

文：專案組　

攝：黃叔榮　

場地、服裝：IPOSH