何超雲轉口風計劃婚事
賭王何鴻燊三房長女何超雲與男友陳山聰近年屢傳婚訊，昨日又傳出兩人有意接受無綫電視訪問正式宣布婚訊，但傳遭到三太陳婉珍阻撓致令訪問告吹。一直否認結婚的超雲，昨日卻突然轉口風，說會開始為自己計劃婚事，但澄清男友未求婚。
昨日再傳婚訊的超雲，昨午接受本報訪問提到是否真的結婚時，她說：「婚就會結，係人生階段，本來我係冇呢個計劃，但係傳媒一直咁問，我會開始計劃。（同陳山聰一齊計劃？）世事無常，冇得講同邊個，或者佢冇呢個打算。」是否有所暗示？她笑說：「冇，呢個係事實，唔到發生嗰刻都唔知。」
與媽咪關係好好
其後晚上超雲出席時裝活動，同場還有名模琦琦、名媛翁嘉穗、汪詩詩等，超雲聞記者恭喜她將結婚一事，繼續表示原本未有想過幾時結婚，對傳出經已拍攝婚紗照時，她續說：「傳得咁勁，今晚開始諗吓。」對於被指遭三太反對在節目宣婚一事，她代母作出澄清，說：「由細到大，媽咪同我哋關係好好，畀好大自由度我哋，所以唔想抹黑佢，令佢聲譽受損。我媽同我哋三姊弟感情好好，好融洽，從來唔會鬧我哋，唔會吵大鑊，佢只會教導，循循善誘，傳聞咁講對我媽咪有影響，必須要澄清，媽咪知我哋大個，會畀好多空間我哋，所以冇發生雜誌所講情況。（如果即時結婚父母會點？）未諗，不過爹哋都催嘅。（你哋自把自為宣婚？）大家識我咩人，都知我唔會咁做，唔係藝人，唔使宣傳。（你覺得結婚係咪兩個人嘅事？）係咪兩個人事？結婚係你哋寫，我今晚返去諗吓。（你有冇同番陳山聰講過？）不實報道唔會談論，（陳山聰係咪喺葡萄牙向你求婚？）冇求婚。」
襯唔襯問番山聰
對經常被指和男友並非門當戶對，山聰有否不開心時，她說：「你哋問番佢，冇談論，淨係講係嘅嘢。」早前山聰生日，超雲跟他食飯慶祝，亦有約同三太一齊飲茶，至於送甚麼禮物，她只說是普通一份禮物。超雲出席完活動後，活動的公關在微博留言：「今晚很開心見番你，係唔係陳太唔重要了。」超雲在微博回覆對方說：「我係何小姐，哈哈。」
昨日傳出何超雲擁有5億身家準備嫁男友，指陳山聰早在葡萄牙已求婚成功，準備在查小欣的電視節目中爆婚訊令三太就範批准兩人結婚，但傳遭三太阻撓而告吹。
文：名人組